Një qytetar ka raportuar pranë redaksisë së JOQ Albania një ngjarje shqetësuese që pretendohet të ketë ndodhur më datë 8 prill 2025, në qytetin e Kavajës.
Sipas dëshmisë së qytetarit, në këtë incident dyshohet se është përfshirë një i ri 19-vjeçar, i cili sipas tij është nipi i një ish-kryetari bashkie, dhe që dyshohet se ka nxjerrë një armë zjarri gjatë një konflikti pranë një servisi automjetesh, duke tentuar të vrasë pronarin e këtij biznesi.
Po sipas tij, për fat të mirë, arma është bllokuar dhe nuk ka qëlluar, duke shmangur pasojat tragjike të mundshme.
Qytetari pohon se në përleshje janë përdorur edhe mjete të forta, si leva apo zinxhirë, dhe se disa persona kanë përfunduar në spital, duke u transportuar me dy ambulanca.
Ai shpreh shqetësimin se kjo ngjarje nuk është bërë publike dhe dyshon se mund të jetë mbajtur e fshehtë nga autoritetet për shkak të lidhjeve të mundshme të përfshirëve me pushtet apo influencë.
JOQ Albania thekson se nuk ka kryer një verifikim të pavarur të vërtetësisë së këtyre pretendimeve dhe e paraqet këtë informacion si një denoncim të pakonfirmuar nga një qytetar. Të gjitha detajet e përmendura bazohen vetëm në dëshminë e këtij individi që ka kontaktuar redaksinë.
Në interes të transparencës dhe të së vërtetës publike, JOQ Albania i drejtohet Policisë së Shtetit me një thirrje publike për të sqaruar zyrtarisht nëse një incident i tillë është regjistruar më datë 8 prill në qytetin e Kavajës dhe nëse janë ndërmarrë veprime për të verifikuar rrethanat e raportuara.
Redaksia e JOQ Albania ka raportuar më herët për një sërë ngjarjesh të tjera, të cilat fillimisht është tentuar të mbahen të fshehta, por që pas publikimit dhe reagimeve të qytetarëve, kanë rezultuar të vërteta dhe janë konfirmuar edhe nga institucionet përkatëse.
