Incidenti i rëndë që ndodhi brenda shtëpisë së Big Brother ka tronditur jo vetëm publikun, por ka ngritur edhe një valë të fuqishme akuzash ndaj vetë Top Channel dhe mënyrës si menaxhohet ky format.
Gjithçka nisi kur, në një moment tensioni gjatë largimit të Gjestit nga gara, Jozi e goditi me forcë sapo ai tentoi t’i hapte derën për t’u larguar. Veprimi u shoqërua nga një deklaratë e rëndë e Jozit, i cili ulëriti: “S’ka lind ai p** nane që ma hap derën mu!”*, para se ta godiste me shuplakë.
Goditja e rrëzoi Gjestin në tokë, duke shkaktuar panik në shtëpi. Ndërhyrja e emergjencës dhe ndërprerja e menjëhershme e transmetimit e ktheu show-n në një emergjencë reale. Por më e rëndë se kaq, ishte reagimi zyrtar i Top Channel, që në vend të transparencës, u përpoq të largohej nga përgjegjësia me një deklaratë sterile, duke thënë se incidenti ishte i papritur dhe nuk kishte qenë i organizuar.
Kjo është e papranueshme për një format televiziv që pretendon të jetë nën kontroll të rreptë të produksionit, me kamera 24/7 dhe protokolle sigurie të supozuara. Si ka mundësi që një konflikt kaq i ndezur nuk u parandalua? Pse produksioni nuk ndërhyri më parë për të shuar tensionet e mbledhura?
Në fakt, audienca ka kohë që vëren se nxitja e konflikteve dhe tensioneve është kthyer në strategji për të mbajtur publikun para ekranit. Ky incident e vërteton më së miri këtë prirje të rrezikshme: spektakli është kthyer në spektakël dhune.
Ndërkohë, nga pikëpamja ligjore, Jozi është shoqëruar nga policia dhe ndaj tij po procedohet për veprën penale të “Dëmtime të tjera me dashje”, sipas Nenit 90 të Kodit Penal, i cili parashikon gjobë ose deri në 6 muaj burg, nëse ekspertiza mjeko-ligjore vërteton se dëmtimet janë serioze.
Gjesti ndodhet jashtë rrezikut për jetën, por është nën kujdesin e mjekëve dhe pritet raporti zyrtar mbi dëmtimet e pësuara.
Publiku, ndërkohë, është i revoltuar dhe kërkon llogari jo vetëm nga autori i dhunës, por edhe nga Top Channel, që tashmë duket se po përpiqet të lajë duart si Ponc Pilati, ndërsa e gjithë përgjegjësia morale dhe profesionale bie mbi ta.
Duke nxitur përplasjet për audiencë dhe duke mos ndërhyrë në kohë, Top Channel ka kontribuar drejtpërdrejt në krijimin e një klime dhune që përfundoi me përfundime reale: një qytetar në tokë, një tjetër në pranga, dhe një publik i tronditur.
Big Brother mund të jetë një eksperiment social, por asnjë eksperiment nuk justifikon dhunën dhe as spektaklin mbi vuajtjen e njeriut. Përgjegjësia është publike dhe duhet mbajtur.
