Drejtuesja politike e PS-së në Fier, Belinda Balluku, hodhi akuza ndaj kundërshtarit të saj, Gazment Bardhi se ky i fundit ka bullizuar vajzat.
Bëhet fjalë për kandidatet socialiste Zegjine Çaushi në Roskovec dhe Kiduina Zaka në Lushnje.
Balluku tha se përgjigjen Bardhit ia dhanë qytetarët. Sa i përket videove të Çaushit ndaj Bardhit që u bënë virale në fushatë, Balluku tha se ajo mbrojti veten e vet.
Si shembull të bullizimeve mori edhe veten e vet dhe fotomontazhet që sipas saj hedh Bardhi që për Ballukun është “me probleme hormonale”.
Balluku i doli ne mbrojtje Zegjinese ndaj Bardhit, por ama kjo nuk vlen dhe per votat e saj ne Qarkun Fier, ku mesa duket me ‘urdher Partie’ Zegjinea nuk duhet te dale deputete, dhe tashme eshte zyrtare qe ajo nuk eshte ne listen fituese. Por Balluku refuzoi te flase per kete gje.
Zgjedhjet e 11 majit kanë sjellë surpriza në çdo qark, por gara për votën preferenciale në Fier po tërheq vëmendje të veçantë për një fenomen interesant: ndërkohë që kandidatët tradicionalë të Partisë Socialiste kanë arritur të marrin mijëra vota, një nga figurat më të njohura në rrjet – Zegjine Çaushi – mbetet jashtë loje.
Klevis Jahaj dhe Asfloral Haxhiu kryesojnë me mbi 11 mijë vota secili, ndërsa më pas vijnë Ceno Klosi (7,616), Elton Korreshi (5,627), dhe Antoneta Dhima (5,236). Në fund të listës, me vetëm 3,163 vota, qëndron Zegjine Çaushi – emër që u bë i njohur më shumë për videot ironike dhe qëndrimet e saj spontane në rrjete sociale, sesa për ndonjë aktivitet politik apo publik serioz.
Fenomeni “Zegjine” u përhap shpejt dhe krijoi një ndjesi në publik, por duket se fama dixhitale nuk është përkthyer në kapital elektoral. Elektorati fierak ka preferuar figura të tjera më tradicionale, duke refuzuar ta shndërrojë këtë personazh viral në deputete. Kjo tregon se pavarësisht bujës së rrjeteve sociale, vota në kuti mbetet më konservatore dhe kërkon më shumë sesa një prani në TikTok.
