Një operacion i përbashkët mes autoriteteve shqiptare dhe italiane u zhvillua këtë të mërkurë në disa qytete të vendit, përfshirë Tiranën, Durrësin, Fierin dhe Vlorën, në kuadër të hetimeve për trafik ndërkombëtar droge dhe pastrim parash.
Operacioni i koduar “Ura” është fokusuar në goditjen e një rrjeti të strukturuar kriminal që dyshohet për trafik heroine dhe kokaine nga Ballkani drejt vendeve të Bashkimit Evropian.
Burime nga grupi hetimor bëjnë me dije se janë lëshuar 52 urdhër-arreste në Shqipëri dhe Itali me akuzat për trafik droge, shpërdorim detyre dhe pastrim parash ndërsa janë sekuestruar pasuri me vlerë miliona euro.
Në aksionin e shtrirë në disa qytete morën pjesë forcat e rendit, agjentët e Byrosë Kombëtare të Hetimit (BKH), si dhe përfaqësues të antimafias italiane ndërsa hetimet ndiqen nga prokurori i SPAK Vladimir Mara.
Sipas mediave italiane, në listën e urdhër-arresteve ka edhe punonjës policie, avokatë dhe emra të njohur të botës së krimit, të dyshuar për përfshirje në rrjetin e trafikut dhe për shpërdorim detyre.
Për momentin burimet konfirmojnë arrestimin e dy personave në Vlorë dhe ndalimin në Fier të administratorit të një shoqërie transporti pasagjerësh me autobuz. Po ashtu thuhet se ka masë sigurie edhe për biznesmenin Ervis Doçi, i njohur si Visi i Pojës.
Hetimet po udhëhiqen nga Prokuroria e Posaçme kundër Krimit të Organizuar dhe Korrupsionit (SPAK), në bashkëpunim me autoritetet italiane dhe Europol-in.
Operacioni është në vijim dhe pritet që gjatë ditës të publikohen detaje të tjera nga SPAK dhe autoritetet italiane.
Një operacion i madh ndërkombëtar ka nisur agim nga Drejtoria e Hetimit Antimafia e Barit, në bashkëpunim me SPAK dhe Policinë e Shtetit, kundër një rrjeti të gjerë kriminal të përfshirë në trafikun ndërkombëtar të drogës, pastrimin e parave dhe shpërdorimin e detyrës.
Operacioni, i quajtur ‘ura’, përfshin ekzekutimin e urdhrave të sekuestrimit të aseteve në Shqipëri dhe Itali, në lidhje me asete të luajtshme dhe të paluajtshme, për një vlerë prej disa milionë eurosh dhe dy urdhra paraprakë ruajtjeje, të lëshuar nga Gjykatësi për Hetimet Paraprake të Barit dhe nga Gjykatësi në Gjykatën e Posaçme të Shkallës së Parë Kundër Korrupsionit dhe Krimit të Organizuar të Tiranës kundër 52 personave përgjegjës, në kapacitete të ndryshme, për trafikim ndërkombëtar të sasive të mëdha narkotikësh, pastrim parash dhe shpërdorim detyre.
Aktiviteti hetimor është pjesë e projektit më të gjerë hetimor të DDA-së së Barit dhe SPAK-ut të Tiranës që synon luftimin e trafikut të pandërprerë ndërkombëtar të kokainës dhe heroinës, të menaxhuar nga organizatat kriminale shqiptare, të cilat lëvizin sasi të mëdha heroine dhe kokaine midis Ballkanit, Evropës Veriore dhe Puglias.
Detaje të mëtejshme mbi operacionin do të ofrohen gjatë një konference për shtyp online në orën 11:30 të mëngjesit, në të cilën do të marrin pjesë Altin Dumani – Prokuror i Posaçëm për Antikorrupsionin dhe Krimin e Organizuar të Tiranës, Roberto ROSSI – Prokuror Publik i Barit, Prokurori i Përgjithshëm Michele Carbone – Drejtor i DIA-s dhe Gianluca Forlani – Anëtar për Italinë i Eurojust.
Sipas hetuesve, aktiviteti kriminal ishte pjesë e një sistemi të konsoliduar të trafikimit të kokainës dhe heroinës, me rrugë që lidhnin Ballkanin, Puglian dhe Evropën Veriore. Hetimet janë pjesë e një projekti më të gjerë hetimor të përbashkët nga DDA e Barit dhe SPAK i Tiranës, që synon shpërbërjen e organizatave mafioze shqiptare, të cilat kanë qenë protagoniste në kontrollin e trafikut ndërkombëtar të drogës për vite me radhë.
