Një ngjarje e pazakontë ka ndodhur në rajonin e Donbasit, ku një ushtar i forcave të armatosura ukrainase ka hyrë gabimisht në një shtëpi të pushtuar nga trupat ruse në fshatin Novoolenovka, në Donetsk, me qëllimin e vetëm për të marrë cigare. Ngjarja është bërë publike nga Murat Gadzhikurbanov, pjesëtar i regjimentit të 33-të të pushkëve me motor të grupit të forcave Qendrore të Rusisë.
Sipas dëshmisë së tij për agjencinë ruse RIA Novosti, incidenti ndodhi gjatë natës, rreth orës 22:00-23:00, kur ushtari ukrainas, i armatosur me një mitraloz, por pa jelek mbrojtës apo helmetë, hyri i qetë në një banesë ku ndodheshin ushtarë rusë, duke menduar se ishte një nga pozicionet e ushtrisë ukrainase.
“Kur pa që ishim ne, u trondit. E kapëm menjëherë. Doli që kishte ardhur vetëm për të marrë cigare, mendonte se të tijtë ishin aty,” tha Gadzhikurbanov.
Ai shtoi se banesa ku ndodheshin rusët ndodhej vetëm 15 metra larg një tjetër shtëpie të kontrolluar nga forcat ukrainase, çka ka çuar në këtë konfuzion fatal.
Gadzhikurbanov pretendon se ushtari i kapur u tregua bashkëpunues, duke dhënë informacion mbi pozicionet e forcave ukrainase në fshat dhe duke kërkuar që të mos sulmoheshin shokët e tij, duke i siguruar rusët se ishin gati të dorëzoheshin. Megjithatë, sipas tij, forcat ukrainase ofruan rezistencë dhe u “eliminuan”.
Ngjarja hedh dritë mbi situatat e papritura dhe shpesh absurde që prodhon lufta, në një front të ndezur dhe kaotik si ai i Donbasit.
