Presidenti i SHBA-së Donald Trump i tha Reuters se është i pasigurt nëse programi bërthamor i Iranit ekziston pas sulmeve të Izraelit, dhe se bisedimet e SHBA-së me Iranin janë ende të planifikuara për të dielën, megjithatë ai nuk është i sigurt nëse ato do të zhvillohen.
“Ne dinim gjithçka dhe unë u përpoqa ta shpëtoja Iranin nga poshtërimi dhe vdekja. U përpoqa t’i shpëtoja me shumë mund sepse do të doja shumë të kisha parë një marrëveshje të arritur. Ata ende mund të arrijnë një marrëveshje, megjithatë, nuk është tepër vonë,” tha Trump për Reuters në një intervistë telefonike.
Në një intervistë tjetër telefonike me NBC News, Trump përsëriti se Irani “mund të ketë një mundësi tjetër” për të arritur një marrëveshje bërthamore dhe la të kuptohej se iranianët po i drejtohen atij.
“Tani, ata mund të kenë një mundësi tjetër. Do ta shohim,” tha Trump për NBC.
“Po më telefonojnë për të folur,” shtoi Trump pa specifikuar se kush po e telefonon. “Të njëjtët njerëz me të cilët punuam herën e fundit… Shumë prej tyre tani kanë vdekur”, tha ai.
Ndërsa për Axios Trump tha se sulmet e Izraelit ndaj Iranit mund të ndihmojnë përpjekjet e tij për të siguruar një marrëveshje bërthamore me Iranin.
I pyetur nëse mendonte se sulmet e rrezikuan procesin, Trump tha: “Nuk mendoj kështu. Ndoshta e kundërta. Ndoshta tani ata do të negociojnë seriozisht.”
Ai përsëriti sugjerimin e tij se ka ende hapësirë për një marrëveshje. “Nuk munda t’i bindja të arrinin një marrëveshje brenda 60 ditësh. Ata ishin afër, duhet ta kishin bërë. Ndoshta tani do të ndodhë”, tha Trump.
Axios raportoi se Trump nuk pranoi të jepte detaje rreth një telefonate të mundshme sot me kryeministrin izraelit Benjamin Netanyahu. CNN ka kontaktuar Shtëpinë e Bardhë në lidhje me kohën e telefonatës.
