Irani ka reaguar ndaj Izraelit duke sulmuar me raketa. Sipas raportimeve, Teherani ka lëshuar rreth 100 raketa balistike drejt Izraelit.
Shpërthime janë raportuar në Tel Aviv dhe Jerusalem. Më herët Izraeli kishte goditur impiantin bërthamor në Isfahan dhe Fordoë.
Izraeli i ka bërë thirrje banorëve në të gjithë vendin që të qëndrojnë në hapësira të mbrojtura dhe të minimizojnë lëvizjen në zonat e hapura.
Izraeli u ka kërkuar qytetarëve të tij të qëndrojnë pranë “hapësirave të mbrojtura” në një paralajmërim se Irani mund të përpiqet të kryejë sulme “në të gjithë vendin”. Ky paralajmërim vjen orë pas sulmeve të rënda brenda Teheranit.
“Komanda e Frontit të Brendshëm tani u ka udhëzuar banorëve në të gjithë vendin të qëndrojnë afër hapësirave të mbrojtura. Lëvizja në zonat publike duhet të minimizohet dhe tubimet publike duhet të shmangen”, thanë Forcat e Mbrojtjes së Izraelit.
“Pas marrjes së një alarmi, hyni në një hapësirë të mbrojtur dhe qëndroni atje derisa të lëshohet një përditësim zyrtar.”
Pak para se Izraeli të thoshte se kishte kryer sulme në uzinën bërthamore të Isfahanit, udhëheqësi suprem i Iranit, Ali Khamenei paralajmëroi se forcat iraniane do të “veprojnë me forcë” kundër Izraelit. Duke shkruar për X, ai paralajmëron se ata “nuk do të shpëtojnë të padëmtuar nga ky krim”.
“Kombi iranian mund të jetë i sigurt se nuk do të ketë mangësi në këtë drejtim”, ka shkruar ai, duke shtuar se mbrojtja ajrore iraniane është aktivizuar në disa pjesë të Teheranit, pasi ushtria izraelite thotë se po vazhdon të godasë objektiva në Iran.
Më herët sot, Izraeli tha se goditi disa objekte bërthamore dhe ushtarake në të gjithë vendin. Shpërthimet e para u raportuan në kryeqytetin e Iranit, Teheran, rreth orës 03:30 sipas orës lokale. Forcat Ajrore Izraelite thonë në një postim në X se po vazhdojnë “të sulmojnë lançuesit e raketave dhe infrastrukturën” në Iran.
