Blendi Fevziu, një nga figurat më të njohura të gazetarisë shqiptare, vazhdon të befasojë jo vetëm me intervistat dhe debatet në emisionin e tij të famshëm “Opinion”, por edhe me një pasion që e ka kthyer tashmë në një markë të tijën: udhëtimet rreth botës. Njihet si gazetari shqiptar që ka udhëtuar në pothuajse çdo cep të globit, me një rekord prej afro 200 shtetesh të vizituara, gjë që e bën jo vetëm një reporter të ngjarjeve, por edhe një “ambasador” të përvojës njerëzore në planet.
Në një nga episodet e fundit të “Opinion”, një e ftuar e cila u shfaq mjaft e admiruar nga eksperiencat e Fevziut, vendosi ta sfidojë për të gjetur një vend ku ai nuk ka shkelur ende. Ajo rrëfeu me humor se kishte “gërmuar” nëpër hartë për ta nxjerrë në “bllof” gazetarin e njohur dhe kishte gjetur vetëm një rast:
“Ia gjeta njëherë… ka qenë Alula (në Arabinë Saudite). Por nuk po ja dal të gjej vend tjetër ku s’ka qenë. Prandaj sot jam me të vetmin shqiptar që adhuroj për pjesën e pushimeve!” – tha ajo me një buzëqeshje sfiduese.
Fevziu, me modestinë karakteristike, nuk e pranoi të ishte i paarritshëm në këtë aspekt dhe u shpreh:
“Jo, ka shumë shqiptarë që udhëtojnë, e di sa më shkruajnë çdo ditë? Janë shqiptarë që jetojnë jashtë dhe më befasojnë vërtet. Më sugjerojnë vende ku ndonjëherë s’kisha menduar të shkoja, më thonë: shko këtu, shko atje… dhe më habisin!”
Ai shtoi se udhëtimi i radhës nuk do të jetë më pak i veçantë dhe se është në fazë planifikimi për një aventurë të re:
“Udhëtimi im i radhës është pak i koklavitur. Do bëj Tajvanin, Tibetin dhe ndoshta ndonjë pjesë tjetër të Azisë që më ka mbetur ende pa e eksploruar.”
E ftuara, e cila dukej se ishte përgatitur mirë për ta “sfiduar”, u dorëzua me një buzëqeshje: “Nuk e sfidoj dot!”, duke pranuar se përvojat e Fevziut në udhëtime janë thuajse të pamundura për t’u tejkaluar.
Blendi Fevziu nuk është thjesht një udhëtar për hobi. Ai ka ndarë vazhdimisht përvojat e tij me ndjekësit përmes rrjeteve sociale dhe shkrimeve të shkurtra që i shoqëron me fotografi e përshkrime kulturore, historike dhe njerëzore. Nga Andet në Amerikën Latine te tempujt e Azisë, nga xhunglat e Afrikës në rrënojat antike të Lindjes së Mesme – rrëfimet e tij shërbejnë për shumë shqiptarë si një dritare e hapur ndaj botës.
Duket se Fevziu nuk është vetëm një kronikan i politikës shqiptare, por edhe një arkivë e gjallë për përvojat globale. Dhe siç e dëshmon kjo intervistë, për shumë shqiptarë ai është shembulli i një qytetari të botës – që eksploron me sy kritik, kuriozitet të pangopur dhe një dëshirë të pashuar për të kuptuar më shumë për njerëzit, kulturat dhe historitë që e formësojnë planetin tonë.
