Kryeministri Edi Rama në një video-live u drejtua ndaj deputetëve me një thirrje të qartë: brenda dy javësh kërkon inventarët, duke theksuar përgjegjësinë që vjen pas 83 mandateve të fituara dhe nevojën për angazhim më të madh, për të ndalur që disa të ‘flenë më shumë’ dhe për të përgatitur strukturat shtetërore për të rregulluar zonat e zaptuara.
Rama: Në dy javë dua inventarët, kemi marrë 83 mandate, kjo është arsye për të fjetur më pak gjumë. Se ka dhe nga ata që flenë më shumë, por kjo duhet të ndalet. në dy javë dua inventarët, në 2 javorshin e dytë të korrikut, do të bëjmë gati policinë bashkiakë dhe çdo institucion për të rregulluar zonat e zaptuara.
Policia duhet të rrisë vigjilencën për çdo ndërhyrje pa leje.
Kryeministri Edi Rama ka dhënë një paralajmërim të fortë dhe të prerë për të gjithë pronarët e lokaleve dhe individët që kanë zaptuar hapësirat publike përreth pallateve, duke i trajtuar ato si pronë private.
Gjatë një daljeje publike, kreu i qeverisë u ndal veçanërisht te fenomeni i vendosjes së trarëve në hyrjet e blloqeve të banimit, ku në shumë raste qytetarët detyrohen të paguajnë për të hyrë me makinë në vendin ku jetojnë. Po ashtu, Rama akuzoi edhe ata që kanë vendosur tenda për klientët e lokaleve, duke zaptuar hapsira që u përkasin të gjithëve.
“Nuk ka pronë private sa kohë ajo është një hapësirë ku nuk ka leje ndërtimi apo shfrytëzimi. Askush nuk ka më shumë të drejtë mbi tokën përreth pallatit sesa vetë banorët. Aty ku nuk ka ndarje të qartë dhe leje për ndërtim, hapësira është publike dhe e përbashkët,” – tha Rama.
🔒 Çështja e trarëve dhe tarifimit të parkimit
Një nga shqetësimet kryesore që ngriti Kryeministri ishte praktika e përhapur e vendosjes së trarëve në rrugicat mes pallateve, ku shumë individë apo biznese kanë filluar të përfitojnë ekonomikisht duke tarifuar parkimin për banorët apo vizitorët.
“Nuk mund të vësh tra për të marrë para. Nuk mund të vësh tra për të lejuar banorët të paguajnë që të jenë zot të vendit ku jetojnë. Kjo është absurde dhe e paligjshme,” u shpreh Rama me tone të ashpra.
🚫 Paralajmërimi për ndjekje penale
Në deklaratën e tij, Rama theksoi se të gjithë ata që kanë vendosur struktura pa leje – qofshin trarë, tenda apo ndarje fizike që pengojnë qarkullimin – do të përballen me ndjekje penale, për veprat penale të zaptimit të hapësirës publike dhe shkatërrimit të pronës së përbashkët.
“U bëj thirrje të gjithëve: hiqni vetë trarët dhe tendat. Përndryshe do të ndërhyjmë dhe do ketë pasoja ligjore. Këto hapësira nuk janë pronë e askujt veçse e komunitetit,” – shtoi ai.
🔍 Një problem i kahershëm në qytetet shqiptare
Problematika e zaptimit të hapësirave publike pranë pallateve është e përhapur në shumë qytete shqiptare, veçanërisht në Tiranë, Durrës, Elbasan dhe Shkodër. Shpesh, hapësirat mes pallateve, që në teori janë për kalimtarët dhe banorët, shndërrohen në terene private, ku vendosen tavolina lokalesh, struktura metalike, apo edhe barriera fizike.
Pavarësisht se bashkitë dhe IKMT kanë kryer herë pas here aksione çmontimi, ky fenomen vazhdon të jetë një plagë urbane që cënon cilësinë e jetës së banorëve dhe funksionimin normal të hapësirave të përbashkëta.
📢 Çfarë pritet të ndodhë?
Deklarata e Ramës shihet si një sinjal i qartë për një aksion të radhës, i cili pritet të përfshijë:
Identifikimin e trarëve dhe strukturave pa leje
Njoftimin për heqje vullnetare
Ndërhyrjen e forcës publike në rast mosbindjeje
Procedim penal ndaj shkelësve të ligjit
