Një ngjarje e rëndë tronditi ditën e djeshme qytetin e Agia Paraskevi në Greqi, ku një 43-vjeçar u vra në mënyrë makabre në rrugën “Eirinis”, në mes të ditës dhe para kalimtarëve të rastësishëm. Viktima, sipas burimeve të policisë greke, është shtetas norvegjez me banim në Greqi, profesionist në fushën e arsimit dhe baba i dy fëmijëve të mitur.
Sipas mediave greke, trupi i pajetë i viktimës u gjet me të paktën tre plumba në zonën e qafës. Policia arriti ta identifikojë viktimën përmes çelësave që kishte me vete dhe falë dëshmive të qytetarëve që ndodheshin pranë vendit të ngjarjes. Ngjarja ka ndodhur rreth orës 13:00 të ditës së djeshme, duke shkaktuar panik dhe tronditje të thellë në zonë.
Hetimet paraprake kanë çuar në një pistë të qartë për autorësinë e ngjarjes. Burime zyrtare nga policia greke bëjnë me dije se autori kryesor i dyshuar është ish-bashkëshorti i partneres aktuale të viktimës, një shtetas grek që mendohet se e ka kryer vrasjen për motive xhelozie dhe hakmarrjeje. I dyshuari është ende në arrati dhe autoritetet janë në ndjekje të tij, duke përdorur kamerat e sigurisë dhe dëshmitë e banorëve për të ndërtuar itinerarin e arratisë.
Dëshmitarët në vendin e ngjarjes tregojnë se autori ka vepruar me gjakftohtësi. Ai kishte veshur rroba të zeza dhe një maskë për të mos u identifikuar. Pas të shtënave, është parë të largohet me vrap drejt rrugës “Evergetou Giavasis”, por nuk është ende e qartë nëse më pas është futur në ndonjë mjet transporti apo nëse është ndihmuar nga persona të tjerë për t’u larguar nga zona.
Policia greke ka zbuluar gjithashtu se viktima nuk kishte asnjë precedent penal dhe asnjë kontakt të mëparshëm me forcat e rendit, çka përforcon më tej pistën e krimit të pasionit. Ndërkohë, partnerja aktuale e viktimës, e cila besohet të ketë qenë personi që lidhte dy burrat mes tyre, është marrë në pyetje nga autoritetet si dëshmitare kyçe e rrethanave të ngjarjes.
Hetimet vijojnë me intensitet, ndërsa policia u ka bërë apel qytetarëve që të raportojnë çdo informacion të vlefshëm që mund të çojë në kapjen e autorit. Ngjarja ka marrë vëmendje të gjerë në mediat greke, duke hapur sërish debatin mbi krimet për motive personale dhe nevojën për ndërhyrje të hershme në rastet e dhunës në marrëdhënie.
