Astrologu i njohur shqiptar Jorgo Pulla ka ndarë sot në studion e “News24” një parashikim të detajuar mbi ecurinë astrologjike të ditëve dhe javëve në vijim. I njohur për qasjen e tij pozitive dhe analizat e thelluara mbi ndikimin e yjeve, Pulla ka bërë thirrje për më shumë besim dhe përpjekje nga qytetarët, duke theksuar se “fati është shumë afër, mjafton ta kërkosh dhe ta përqafosh në momentin e duhur”.
Sipas tij, shqiptarët janë një popull me shumë energji pozitive dhe të përkushtuar, por ndonjëherë i mungon vendosmëria për të ndërmarrë hapa konkrete drejt suksesit.
“Fati është pas derës. Ne kemi të gjitha kushtet, por duhet ta shtyjmë atë derë. Çdo shenjë ka momentet e veta të arta, por duhet njohje, përpjekje dhe vendosmëri për t’i shfrytëzuar ato,” – tha Pulla në intervistë.
Shenjat më me fat për periudhën e ardhshme, sipas astrologut Jorgo Pulla:
Luani
Java që vjen do të jetë ndriçuar nga pozicionimi i favorshëm i Diellit dhe Marsit, duke sjellë rritje të energjisë, mundësi për fitime financiare dhe një lajm të mirë në jetën personale. Luanët që punojnë në administratë, komunikim, media apo art do të shohin progres të papritur. Në dashuri, një takim i ri mund të kthehet në lidhje të qëndrueshme.
Bricjapi
Pas një periudhe reflektimi dhe paqartësish, Bricjapët do të përballen me kthesa pozitive. Një mundësi profesionale që dukej e humbur mund të rikthehet me më shumë potencial. Nëse kanë menduar për një investim, është koha ta bëjnë. Ndikimi i Saturnit në këtë fazë i bën më të kujdesshëm, por edhe më të suksesshëm në vendime.
Binjakët
Yjet janë të sinkronizuara me qëllimet tuaja. Binjakët do të përfitojnë në rritjen e ndikimit në rrethin shoqëror, në karrierë dhe në projekte që kërkojnë bashkëpunim. Jupiteri favorizon udhëtimet dhe çështjet ligjore. Nëse keni një ide të re, mos ngurroni ta nisni – energjia është në anën tuaj.
Këshilla e astrologut:
“Mos i lini mundësitë të kalojnë pranë jush. Yjet japin sinjalet, por jeni ju që duhet të bëni lëvizjen. Një telefonatë, një takim apo një ide mund të ndryshojë të gjithë drejtimin e jetës tuaj. Shfrytëzoni këtë muaj për vendime të mëdha, sepse në vjeshtë nis një cikël i ri më i vështirë për disa shenja.”
Në ditët në vijim, pritet një ndikim më i fortë i Venusit dhe Uranit në disa shenja që do të sjellë ndryshime të papritura, sidomos në fushën e marrëdhënieve personale dhe stabilitetit ekonomik. Për horoskopin ditor dhe mujor, qëndroni me sytë nga qielli – dhe nga lajmet tona!
