Gjithnjë e më shumë, duket se kufiri midis botës së showbiz-it dhe botës së krimit po zbehet, dhe këtë herë jo përmes këngëve apo spektakleve, por përmes vizitave të dyshimta brenda burgjeve shqiptare, të lejuara e ndoshta të orkestruara nga vetë drejtuesit e institucioneve të vuajtjes së dënimit.
Pas jehonës së madhe që mori vizita e modeles së njohur nga Kosova, Ziza Pajaziti, tek i shumëkërkuari i drejtësisë shqiptare Laert Haxhiu, aktualisht i burgosur në Durrës, një tjetër skandal me përmasa të ngjashme ka shpërthyer — këtë herë në burgun e Shkodrës.
Sipas burimeve konfidenciale për JOQ Albania, një figurinë mjaft e njohur e botës së modës dhe ekranit shqiptar është duke zhvilluar vizita të rregullta tek një i dënuar famëkeq, pjesë e botës së krimit, në ambientet e IEVP-së Shkodër. Ajo që e bën këtë rast edhe më të ndërlikuar është se vizitat nuk regjistrohen me emrin e saj të vërtetë, por përmes manipulimit të sistemit dhe përdorimit të identitetit të një të burgosuri tjetër – një manovër që synon të shmangë çdo gjurmë në dokumentacionin zyrtar.
“Janë të shkruajtura në regjistrin e takimeve. Ka hyrë me emër tjetër,” – shprehet burimi për JOQ.
Por skandali nuk mbaron këtu. Ky favor i pazakontë, sipas të njëjtit burim, është lejuar me dijeni të plotë dhe miratim nga drejtori i burgut të Shkodrës, Leonard Mardoda, si dhe nga shefi i policisë së institucionit, Dylber Beqiri.
Skema nuk është rastësore. Informacionet brenda burgut tregojnë se një praktikë e tillë favorizimi nuk është risi, por pjesë e një zinxhiri të mirënjohur manovrash, që shtrihen brenda sistemit penitenciar shqiptar dhe që, sipas burimeve, përdoret në mënyrë të sistematizuar kur bëhet fjalë për emra të njohur të botës së krimit — të cilët, ndonëse të dënuar, gëzojnë privilegje që i afrojnë më shumë një suite hoteli se një qelie.
Favorizimi i të fortëve – reflektim i një sistemi të kalbur?
Ky skandal i radhës hedh dritë mbi problemet serioze të korrupsionit dhe mungesës së integritetit brenda sistemit të burgjeve në Shqipëri. Përdorimi i figurave publike për të vizituar të dënuar me influencë, përmes manipulimit të protokolleve, tregon jo vetëm për kapjen e institucioneve, por edhe për një bashkëjetesë të heshtur mes krimit të organizuar dhe strukturave shtetërore.
Pyetja që lind është: A po kthehen burgjet shqiptare në skena VIP për kriminelët me lidhje dhe pasuri? Dhe nëse po, kush do të mbajë përgjegjësi për këto privilegje të fshehta?
Ndërkohë që publiku informohet përmes lajmeve skandaloze, sistemi penitenciar hesht, ndërsa drejtuesit e burgjeve, të emëruar politikisht, duket se kanë zgjedhur të shërbejnë më shumë interesave të të fortëve se sa zbatimit të ligjit.
Këto zhvillime kërkojnë hetim të thelluar institucional, përgjegjësi të drejtpërdrejta dhe transparencë. Sepse në një shtet që synon të jetë ligjor dhe europian, burgjet nuk mund të funksionojnë si hotele për të privilegjuarit, ndërsa drejtësia të varet nga emri, fama apo ndjekësit në Instagram.
