Një lajm i trishtë ka prekur familjen Rrumbullaku në këtë fillim jave. Elsa Rrumbullaku, bashkëshortja e ish-drejtorit të Përgjithshëm të Policisë së Shtetit, Muhamet Rrumbullaku, ka ndërruar jetë në moshën 55-vjeçare pas një beteje të gjatë dhe të vështirë me një sëmundje të rëndë.
Burime për “Newsbomb.al” bëjnë të ditur se Elsa Rrumbullaku ka ndërruar jetë pas një periudhe të gjatë trajtimi mjekësor, gjatë së cilës ajo luftoi me forcë dhe dinjitet kundër sëmundjes. Pavarësisht përpjekjeve të saj dhe mbështetjes së familjes, ajo nuk arriti ta fitojë këtë betejë.
Elsa Rrumbullaku ishte jo vetëm bashkëshortja e një prej figurave më të njohura të strukturave të sigurisë në vend, por edhe një nënë e dashur dhe mbështetëse e palëkundur e familjes së saj. Ajo dhe Muhamet Rrumbullaku ishin prindër të dy djemve, Marvin dhe Erlis, të cilët i kanë qëndruar pranë në çdo moment të vështirë.
Ceremonia mortore për ndarjen nga jeta të Elsa Rrumbullakut u zhvillua këtë të hënë, e shoqëruar nga lotët, dhimbja dhe heshtja e thellë e familjarëve, të afërmve dhe miqve të shumtë të familjes. Shumë personalitete të njohura të jetës publike, përfaqësues të strukturave të sigurisë, miq të vjetër dhe bashkëpunëtorë të Muhamet Rrumbullakut kanë shprehur ngushëllimet e tyre për këtë humbje të parakohshme dhe të thellë.
