Një ngjarje e rëndë ka tronditur qytetin e Vlorës mëngjesin e së hënës, ku një vajzë 17-vjeçare dyshohet se ka tentuar t’i japë fund jetës duke qëlluar veten me armë zjarri në kokë. Ngjarja e rëndë ka ndodhur në banesën e saj në lagjen “Kushtrimi”, dhe raportohet se paraprakisht ka pasur një sherr të ashpër me të atin, i cili nuk pranonte stilin e jetesës së adoleshentes.
Gjendja shëndetësore – kritike dhe e paqëndrueshme
Menjëherë pas ngjarjes, e mitura është transportuar me urgjencë në spitalin rajonal të Vlorës në gjendje të rëndë për jetën, ndërsa më pas është nisur drejt Spitalit të Traumës në Tiranë, ku ndodhet aktualisht e intubuar dhe nën mbikëqyrje intensive nga mjekët.
Burimet spitalore bëjnë me dije se plumbi ka prekur zonën e kokës, pranë syrit, dhe ndonëse vajza ka mbërritur fillimisht në gjendje të vetëdijshme, situata është përkeqësuar shumë shpejt.
Dyshime për presion psikologjik dhe sjellje abuzive
Policia dhe grupi hetimor po punojnë për zbardhjen e plotë të ngjarjes, ndërsa dyshimet e para hedhin dritë mbi një përplasje të vazhdueshme mes vajzës dhe të atit, Saimir H., i cili pas ndarjes nga bashkëshortja ka tentuar ta marrë të bijën në një fshat ku kishte krijuar një familje të re. Vajza, e rritur me gjyshërit e saj, raportohet se e kishte refuzuar këtë zhvendosje, gjë që çoi në konflikte të herëpashershme mes tyre.
Ka dyshime të forta se babai e ka shtyrë vajzën e tij drejt vetëvrasjes pas një debati me të. Ai, nuk e pranonte stilin e jetesës së saj.
Mësohet se në momentin e ngjarjes, ka pasur një debat të ashpër, pas së cilit ndodhi dhe plagosja me armë zjarri.
Zbulohen tentativa për fshehjen e armës dhe provave
Pas ngjarjes, burime pranë policisë kanë bërë me dije se familjarët kanë tentuar të fshehin armën dhe gëzhojën. Kjo ka shtuar më tej dyshimet e hetuesve për rrethana të dyshimta rreth mënyrës se si ndodhi plagosja.
Në këtë kuadër, policia ka marrë për ekzaminim faktorët plotësues nga duart e babait të vajzës, për të përcaktuar nëse është ai personi që ka qëlluar me armë. Ndërkohë, vetë i ati është shoqëruar me forcë në komisariat, pasi ka refuzuar bashkëpunimin me autoritetet.
Pamjet filmike nga momenti i shoqërimit tregojnë babain e vajzës duke kundërshtuar policinë me lot në sy:
“Po më vdes çupa ore!”, dëgjohej të thoshte ai me dëshpërim.
Babai nën hetim – konflikti në qendër të hetimeve
Aktualisht, babai i 17-vjeçares ndodhet në komisariat dhe po merret në pyetje. Policia e Vlorës ka ngritur dyshime të forta se ai mund të ketë ushtruar presion psikologjik ose ndoshta dhunë ndaj së bijës, çka mund të ketë çuar në veprimin ekstrem të saj.
Ndërkohë, në komisariat janë shoqëruar edhe familjarë të tjerë, përfshirë gjyshërit, të cilët aktualisht janë të vetmit që i qëndrojnë pranë të miturës në Spitalin e Traumës.
Deklarata zyrtare e policisë
“Sot, rreth orës 11:40, është paraqitur në spital, në gjendje të rëndë shëndetësore, një shtetase e mitur 17 vjeçe, e cila dyshohet se është vetëplagosur me armë zjarri pistoletë, në banesën e saj, në lagjen ‘Kushtrimi’ të qytetit të Vlorës. Grupi hetimor po punon për sqarimin e plotë të rrethanave të ngjarjes.”
Shqetësim i thellë në opinionin publik
Ngjarja ka ngjallur tronditje të madhe në opinionin publik dhe në rrjetet sociale, ku shumë qytetarë po kërkojnë hetim të thelluar për të zbardhur rrethanat reale. Aktivistë të të drejtave të fëmijëve dhe organizata të shoqërisë civile kanë ngritur shqetësimin për mungesën e mbështetjes psikologjike për të rinjtë, si dhe për mungesën e mekanizmave mbrojtës në rastet e abuzimeve në familje.
Hetimet janë në vijim, ndërsa publiku pret me ankth të mësojë nëse do të mund të shpëtohet jeta e së miturës dhe nëse ngjarja do të marrë një kthesë edhe më tragjike.
