Pushimet verore në bregdetin shqiptar janë kthyer në tragjedi për një grup të rinjsh nga Kosova, pasi një prej tyre ka humbur jetën në rrethana të papritura. Viktima është Anid Samir Hoxha, 20 vjeç, nga Rahoveci, i cili ndodhej me shokët në Dhërmi për disa ditë pushimi.
Ngjarja ka ndodhur pasditen e së dielës, më 14 korrik 2025, pranë një prej plazheve të zonës turistike të Dhërmiut, në një fushë volejbolli buzë detit. Sipas të dhënave paraprake nga policia, Anidi ka humbur ndjenjat papritur teksa po luante me miqtë dhe, pavarësisht përpjekjeve për ta ndihmuar, ka ndërruar jetë në vendngjarje.
“Specialistët e Stacionit të Policisë Dhërmi referuan materiale për vlerësim, pasi më datë 14.07.2025, pranë një plazhi në Dhërmi, në fushën e volejbollit, dyshohet se ka humbur jetën për shkaqe natyrale shtetasi A. H., 20 vjeç, banues në Kosovë, i cili ndodhej me pushime së bashku me shoqërinë e tij”, – thuhet në njoftimin zyrtar të policisë lokale.
Trupi i pajetë i të ndjerit është transportuar në Tiranë, ku pritet të kryhet autopsia në Institutin e Mjekësisë Ligjore, me qëllim përcaktimin e saktë të shkakut të vdekjes. Burime jozyrtare dyshojnë për një arrest kardiak të menjëhershëm, por konfirmimi do të vijë pas ekzaminimeve të plota mjekoligjore.
Lajmi për vdekjen e parakohshme të 20-vjeçarit ka tronditur opinionin publik në Rahovec dhe më gjerë. Kryetari i Komunës së Rahovecit, Smajl Latifi, ka reaguar menjëherë pas lajmit të hidhur, duke shprehur dhimbjen për këtë humbje të rëndë:
“Me pikëllim të thellë morëm lajmin për ndarjen nga jeta të 20-vjeçarit nga Rahoveci, Anid Samir Hoxha. Anidi po qëndronte për pushime në bregdetin shqiptar, së bashku me shokët e tij.
Kjo humbje e papritur na preku thellë të gjithëve, familjen, shokët dhe secilin që e njohu Anidin, si djalë të mirë e të dashur.
Ngushëllimet më të sinqerta për familjen Hoxha, miqtë dhe për të gjithë ata që ndjejnë dhimbjen e kësaj humbjeje të rëndë.
Qoftë i lehtë dheu për Anidin!”, – shkroi Latifi në rrjetet sociale.
Anid Hoxha ishte një i ri i njohur dhe i respektuar në komunitetin e tij. Vdekja e tij në kulmin e rinisë ka lënë pas një boshllëk të thellë, jo vetëm për familjen dhe miqtë e tij të ngushtë, por për gjithë ata që e njihnin si një djalë të qetë, pozitiv dhe plot jetë.
Autoritetet shqiptare po vazhdojnë hetimet për të sqaruar të gjitha rrethanat e ngjarjes, ndërsa familjarët janë nisur drejt Shqipërisë për të marrë trupin e të ndjerit dhe për ta përcjellë në banesën e fundit në vendlindje.
Ngjarja ka rikthyer edhe një herë vëmendjen ndaj nevojës për ndihmë mjekësore emergjente të shpejtë në zonat turistike gjatë sezonit veror, ku mijëra pushues shqiptarë dhe të huaj frekuentojnë bregdetin e jugut.
