Biznesmeni dhe modeli i njohur Elton Ilirjani ka qenë në qendër të vëmendjes mediatike në fund të vitit të kaluar për ndihmën e jashtëzakonshme që i ofroi këngëtares legjendare Parashqevi Simaku, e cila prej vitesh kishte humbur çdo kontakt me publikun dhe jetonte në kushte të vështira, madje thuajse të pavërejtura, në një stacion metroje në New York. Ishte pikërisht Ilirjani ai që ndërhyri, duke i ofruar mbështetje dhe mundësi për t’u rikthyer në një jetë më të denjë, një akt që fitoi zemrat e shumë shqiptarëve brenda dhe jashtë vendit.
Por, siç ka rrëfyer vetë në një intervistë të dhënë së fundmi për emisionin “Pushime on Top”, Ilirjani ndjen se kjo histori, megjithëse fisnike, ka filluar ta mbulojë figurën e tij si sipërmarrës, model dhe aktivist i të drejtave të njeriut.
“Me rastin e Parashqevi Simaku, nuk e dija që kishte marrë dhenë. Ishte bërë një histori kombëtare. Dhe tani kur dal në rrugë, më pyesin për Parashqevinë, gjë që është shumë e mirë se unë atë e dua fort, e kam si mamin tim,” shprehet Ilirjani me emocion. “Por, më vjen edhe pak keq, ndihem pak xheloz… Nuk është xhelozi më shumë se sa është një merak për karrierën time.”
I pyetur gjatë pushimeve të tij në jug të Shqipërisë, Ilirjani tha se e ndien që një pjesë e publikut e ka kufizuar figurën e tij në rolin e “shpëtimtarit të Parashqevisë”, duke lënë në hije gjithë angazhimet e tij të tjera: nga aktivizmi në mbrojtje të komunitetit LGBTQ+, te fushatat ndërkombëtare të bukurisë dhe përfshirjes sociale.
“Jam krenar për Parashqevinë dhe për çfarë kemi bërë bashkë. Por kur njerëzit më përmendin vetëm për atë, pyes veten: a ka ikur dëm gjithë karriera ime tjetër? A më kanë parë vetëm si njeriu që ndihmoi një këngëtare në nevojë?”, tha ai me sinqeritet, duke shtuar se ky është një shqetësim që e ka mbajtur për vete për shumë kohë.
Për Elton Ilirjanin, ky është një moment reflektimi, por edhe një thirrje ndaj publikut që të mos harrojë se ai është shumë më tepër sesa një akt i vetëm bamirësie. “Më vjen mirë që shqiptarët e vlerësojnë ndihmën që i dhashë një figure të dashur të së kaluarës si Parashqevi, por më vjen keq nëse e gjithë jeta ime dhe kontributi im reduktohen në këtë episod. Kam bërë dhe do të bëj shumë më tepër”, përfundoi ai.
Intervista ka hapur diskutime në rrjet për mënyrën se si publiku shqiptar etiketon apo identifikon figurat publike me një ngjarje të vetme, duke lënë mënjanë punën dhe identitetin e tyre të plotë. Elton Ilirjani mbetet një prej personazheve më të pazakontë dhe më aktivë në skenën shqiptare, që mesa duket ka ende shumë për të thënë — përtej një akti të madh human.
