Kryeministri Edi Rama, gjatë një takimi me përfaqësues të teknologjisë, inovacionit dhe startup-eve këtë të premte në Berat, u ndal thellësisht tek siguria kibernetike dhe transformimi digjital në Shqipëri. Ai theksoi potencialin e Inteligjencës Artificiale (IA) për të revolucionarizuar administratën publike dhe kontrollin e territorit.
Gjatë diskutimit për teknologjinë dhe të ardhmen digjitale të vendit, kryeministri theksoi rolin e IA-së në monitorimin dhe menaxhimin e territorit. Rama vuri në dukje se Shqipëria tashmë zotëron dronë dhe satelitë për kontrollin e vendit, por ajo që mungon është një sistem informacioni që të përpunohet në kohë reale.
“Ne kemi dronët, që i kemi marrë për të kontrolluar vendin tonë, ne kemi satelitët. Ajo që na mungon është një sistem informacioni që të përpunohet në kohë reale. Nuk ka nevojë për inspektor në territor. Me atë sistem mund të marrim në kohë reale të dhënat dhe me IA të sjell 1, 2, 3, 4 dhe kjo mund të bëhet…,” tha Rama, duke sugjeruar një të ardhme ku teknologjia mund të zëvendësojë nevojën për inspektorë fizikë.
Kreu i qeverisë shkoi edhe më tej, duke shprehur se shumë shpejt mund të vijë dita kur edhe vetë qeveria ose ministrat të zëvendësohen nga Inteligjenca Artificiale. Kjo deklaratë provokuese thekson potencialin e pafundmë të IA-së dhe ndryshimet radikale që mund të sjellë në strukturat qeverisëse.
“Shumë shpejt mund të vijë dita që qeverinë mund ta kesh IA, ministrin mund ta kesh IA, s’ka as kushërinj për të futur në punë. Nuk mund të them që ky është synimi ynë, por është e pafundme kjo botë,” u shpreh ai, duke prekur edhe çështjen e nepotizmit.
Sipas Ramës, teknologjia do të mundësojë sisteme që e monitorojnë territorin në detaje, duke ofruar mundësi të reja për menaxhimin urban dhe rregullimin e hapësirave publike. “Mund të kemi sisteme që të tregojnë për territorin, sa karrige të vë jashtë ose ku mund të parkoj,” theksoi kryeministri, duke ilustruar nivelin e kontrollit dhe efikasitetit që mund të arrihet përmes teknologjisë së avancuar.
Këto deklarata tregojnë një vizion ambicioz të Kryeministrit për transformimin digjital të Shqipërisë dhe integrimin e Inteligjencës Artificiale në qeverisje dhe menaxhimin e vendit.
