Daja i Endri Shabanit nuk i ndahet Adriatik Lapajt. Kreu i Shqipëria Bëhet bëri një ankesë sot në KAS, ku kërkon të marrë ai mandatin me argumentin se lista e mbyllur u dorëhoq, ndonëse ishte e afërmja e tij që u shpall deputete.
Por në lojë është futur sërish Zeqir Kordhoni. Ai ka paraqitur një ankesë në Komisionin e Ankimimeve dhe Sanksioneve (KAS) dhe Komisionin Qendror të Zgjedhjeve (KQZ), duke kërkuar pavlefshmërinë e dorëheqjeve të dhëna paraprakisht nga disa kandidatë të listës.
Në ankesën e tij, Kordhoni i referohet nenit 164 të Kodit Zgjedhor, sipas të cilit “një dorëheqje nga mandati është e vlefshme vetëm pasi kandidati e ka fituar dhe marrë zyrtarisht mandatin”. Sipas tij, dorëheqjet e dhëna përpara shpalljes së rezultatit përfundimtar janë të paligjshme dhe bien ndesh me parimet e të drejtës zgjedhore.
Më tej, Kordhoni hedh dyshime mbi vërtetësinë e nënshkrimeve të disa kandidateve, duke përmendur rastin e Entela Sulës, e cila dyshohet se nuk ndodhej fare në territorin shqiptar ditën e nënshkrimit të dorëheqjes. Ai kërkon hetim të plotë mbi rrethanat dhe datat e nënshkrimit, duke theksuar se çdo presion apo falsifikim do të minonte integritetin e procesit zgjedhor.
Por e çuditshmja është se Entela Sula është motra e Endri Shabanit, pra mbesa e Kordhonit. Në KQZ atë e ka përfaqësur me prokurorë vetë Endri Shabani. Pra duket se po luan dikush tjetër nën emrin e ‘dajos’.
Ankesa e plotë në KAS e Zeqir Kordhonit:
Në cilësinë e palës së interesuar dhe në mbështetje të nenit 164, pika 1 dhe 2, të Kodit Zgjedhor të Republikës së Shqipërisë, paraqes këtë kërkesë për shqyrtim dhe vendimmarrje mbi pavlefshmërinë e deklaratave të dorëheqjes së depozituara nga disa kandidate përpara marrjes së mandatit.
Sipas nenit 164 të Kodit Zgjedhor (“Dorëheqja nga mandati”), një dorëheqje nga mandati është e vlefshme vetëm pasi kandidati e ka fituar dhe marrë zyrtarisht mandatin. Dorëheqjet e dhëna paraprakisht (pra përpara shpalljes së rezultatit përfundimtar dhe marrjes së mandatit) nuk gëzojnë asnjë bazë ligjore dhe bien ndesh me parimet themelore të së drejtës zgjedhore. Çdo akt dorëheqjeje i dhënë përpara momentit të fitimit të mandatit nuk mund të prodhojë efekt juridik dhe mund të shpallet i pavlefshëm nga ana e KQZ-së dhe KAS-it.
Kam gjithashtu arsye serioze për të vënë në dyshim vërtetësinë dhe rrethanat në të cilat janë nënshkruar këto deklarata. A kanë qenë të gjithë nënshkruesit fizikisht të pranishëm në datën që pretendohet se janë nënshkruar deklaratat? A janë nënshkruar këto deklarata në mënyrë të lirë dhe pa ushtruar dhunë apo presion psikologjik? A janë përgatitur dhe nënshkruar këto deklarata sipas formës dhe procedurave ligjore të përcaktuara në Kodin Zgjedhor?
Në dijeninë time, të paktën një prej kandidateve, Entela Sula, që pretendohet se ka firmosur një deklaratë dorëheqjeje në datën 11 Maj, nuk ka qenë fizikisht në territorin e Republikës së Shqipërisë. Gjithashtu dyshime ka edhe për kandidate të tjerë, të cilët jetojnë jashtë Shqipërisë, të cilët mund të mos kenë qenë në Shqipëri në datën që pretendohet se kanë firmosur dorëheqjen. Kjo gjë ngre dyshime serioze mbi vërtetësinë e këtyre akteve.
Në bazë të sa më sipër kërkoj:
Shpalljen e pavlefshme të të gjitha deklaratave të dorëheqjes së dhëna përpara marrjes së mandatit parlamentar, si të kundërligjshme dhe në shkelje të nenit 164 të Kodit Zgjedhor.
Hetimin dhe verifikimin e rrethanave të nënshkrimit të këtyre deklaratave, përfshirë datën reale të nënshkrimit, vendndodhjen e secilit person nënshkrues dhe mënyrën në të cilën janë marrë këto deklarata.
Theksoj se integriteti i procesit zgjedhor dhe respektimi i vullnetit të zgjedhësve kërkon që dorëheqjet e dhëna në mënyrë të parakohshme ose të falsifikuara të shpallen të pavlefshme.
