Ditën e sotme, më 30 korrik 2025, vendi ynë do të ndikohet nga kushte atmosferike relativisht të paqëndrueshme, të cilat do të shfaqen më së shumti në formën e vranësirave të përqendruara dhe reshjeve të dobëta.
Moti në orët e paradites do të karakterizohet nga alternime kthjellimesh dhe vranësirash, të cilat do të jenë më të dendura përgjatë ultësirës perëndimore dhe zonave malore veriore dhe verilindore. Këto zona do të jenë më të ekspozuara ndaj reshjeve të shiut me intensitet të ulët dhe në formë të herëpashershme, kryesisht në zonat e thella malore të veriut dhe verilindjes, si Kukësi, Tropoja, Dibra dhe Puka.
Gjatë mesditës dhe orëve të pasdites, një front lokal reshjesh pritet të prekë edhe zonat fushore dhe bregdetare, përfshirë rrethinat e Lezhës, Shkodrës, Tiranës dhe Fierit, ku do të ketë reshje të përkohshme me intensitet të dobët, të shoqëruara me shtim lokal të vranësirave.
Era do të fryjë kryesisht nga veriperëndimi në verilindje, me një shpejtësi mesatare rreth 8 m/s, por gjatë orëve të mesditës dhe pasdites, në zonat bregdetare si Vlora, Durrësi dhe Saranda, si dhe në luginat e Shkumbinit dhe Drinit, do të arrijë shpejtësi deri në 17 m/s, duke krijuar një ndjesi më të freskët dhe të turbullt, sidomos në bregdet.
Valëzimi në det do të jetë i lehtë, me forcë 1-2 ballë, çka nënkupton një det të qetë për lundrim dhe aktivitete detare në pjesën më të madhe të brigjeve shqiptare.
Temperaturat mbeten relativisht të larta për periudhën, por nuk do të ketë rritje të ndjeshme. Ato do të luhaten:
zonat malore: 15°C – 25°C
ultësira perëndimore: 20°C – 30°C
zonat bregdetare: 22°C – 29°C
Në mbrëmje pritet përmirësim i ndjeshëm i kushteve të motit, me kthjellime në pjesën më të madhe të territorit dhe rënie të intensitetit të erës.
🔔 Këshillë: Personat që planifikojnë udhëtime në zonat veriore dhe në lartësi mbi 1000 metra duhet të kenë parasysh rreshje të mundshme dhe erë të fortë në disa segmente rrugore.
Përditësimet e mëtejshme mbi motin do të publikohen në vijim, në varësi të lëvizjes së masave ajrore gjatë pasdites dhe natës.
