Kërkimi ndaj Kumbaros sot bëhet për veprën penale të emigracionit të paligjshëm, pra për faktin se ai ka qëndruar në Mbretërinë e Bashkuar në mënyrë të paligjshme
Prej 2011 ka humbur çdo gjurmë, ndërsa në Shqipëri, ish-Gjykata e Krimeve të Rënda e ka dënuar me 15 vite burg në një proces që kishte të bënte me zhdukjen e biznesmenit Remzi Hoxha, një nga çështjet më të mistershme të tranzicionit shqiptar.
Bëhet fjalë për Ilir Kumbaron, ish-kreun e zyrës së SHIK të Tiranës, para vitit 1997, gjatë periudhës kur ky institucion drejtohej nga Bashkim Gazidede, një prej më të besuarve të Sali Berishës, që në atë periudhë mbante postin e Presidentit të Republikës.
Së fundmi, Policia në Londër ka vendosur ta shpallë në kërkim Kumbaron, që është zhdukur pa gjurmë prej 2011, kohë kur një Gjykatë në Britaninë e Madhe do të vendoste nëse ai do të ekstradohej ose jo në Shqipëri, ku po zhvillohej gjyqi ndaj tij dhe disa të dyshuarve të tjerë.
Prej asaj kohe, Kumbaro humbi çdo gjurmë, edhe pse në shtypin e kohës raportohej se ai monitorohej përmes një byzylyku të vendosur nga autoritetet britanike.
Apeli i Policisë së Londrës shoqërohet me një foto të ish zyrtarit të rëndësishëm të SHISH kur ai u prangos në shtator 2008 për qëllim ekstradimi në Shqipëri, raporton TCH, ndërkohë që në skedën e publikuar thuhet se ai është sot 70 vjeç.
“Ky person sot 70 vjeç, dështoi të paraqitet në 2011 pas një urdhër arresti lëshuar nga Shqipëria për krime që lidhen me rrëmbim dhe torturë personi”, thotë Metropolitan Police.
Kërkimi ndaj Kumbaros sot bëhet për veprën penale të emigracionit të paligjshëm, pra për faktin se ai ka qëndruar në Mbretërinë e Bashkuar në mënyrë të paligjshme. Nuk dihet nëse ish-zyrtari i lartë i SHIK të para 1997-ës ndodhet ende në ishull, por Policia e Londrës e ka përfshirë në listën e personave të kërkuar.
“Lloji i krimit: vepra penale të imigracionit të paligjshëm
Emri i të dyshuarit: Ilir KUMBARO
Detajet e plota
Urdhër arresti evropian i lëshuar në vitin 2011 për veprën penale të Torturës dhe Rrëmbimit të Personit”, thuhet në njoftimin e publikuar.
Ndaj Kumbaros janë ngritur akuza se ka urdhëruar rrëmbimin e më torturimin e Remzi Hoxhës, i cili është zhdukur prej 1995-ës, kohë kur sipas raportimeve, u mor forcërisht nga persona civilë dhe më pas u zhvendos në bazën e SHIK në Kune Vain të Lezhës.
Hetimet zbuluan se ai ishte rrëmbyer në Tiranë nga zyrtarët e SHIK në rrugën “Siri Kodra”, afër një magazine që ndodhet tek zona e quajtur “Frigoriferi”. Trupi i tij nuk u gjet asnjëherë.
Bashkë me Remzi Hoxhën, u rrëmbyen edhe Zizo Kristopulli dhe Avdyl Loshaj. Lidhur me ngjarjen ka pasur aludime të shumta, ndërsa për krimin nuk u hodh kurrë dritë, edhe pse ka pasur dëshmi dhe kërkesa të shumta nga familjarë të të zhdukurit.
