Mistikja e famshme bullgare, Baba Vanga, edhe pse ka ndërruar jetë më shumë se një çerek shekulli më parë, vazhdon të jetë një figurë jashtëzakonisht e diskutuar në rrjetet sociale dhe në media. Kjo ndodh jo vetëm për shkak të parashikimeve të saj të famshme për të ardhmen e njerëzimit, por sepse shumë nga profecitë e saj thuhet se kanë përputhje me ngjarje reale. Së fundmi, emri i saj është bërë sërish trend në platformat si TikTok, Instagram dhe Twitter, për shkak të një parashikimi që lidhet me vizitën e alienëve në Tokë në vitin 2025.
Sipas mbështetësve të profecive të Baba Vangës, ajo ka parashikuar se njerëzimi do të bëjë kontakt me një formë jete jashtëtokësore, e cila mund të sjellë një krizë globale apo madje edhe një apokalips të mundshëm. “Do të vijë një fuqi nga qielli që do të ndryshojë gjithçka,” – thuhet se është një nga thëniet e saj për vitin 2025, e interpretuar nga ndjekësit si një referencë për jetën aliene ose ndërhyrje nga kozmosi.
Objekti 3I/ATLAS: një vizitor i panjohur nga hapësira
Ajo që ka ndezur më tej zërat për realizimin e profecisë së Baba Vangës është zbulimi i një objekti misterioz ndër-yjor, i quajtur 3I/ATLAS, i cili është zbuluar së fundmi nga astronomët në Kili, duke përdorur teleskopë të fuqishëm. Objekti është i madh në përmasa, thuajse sa qyteti i Manhattan-it, dhe po udhëton me shpejtësi të pazakontë drejt sistemit tonë diellor.
Për herë të parë që nga zbulimi i “Oumuamua” në vitin 2017 – një objekt tjetër ndër-yjor që shkaktoi teori të shumta për origjinën e tij – 3I/ATLAS është cilësuar si një vizitor potencialisht artificial, pra një objekt që mund të ketë ardhur nga një inteligjencë jashtëtokësore.
Ndër më skeptikët por edhe më kuriozët është profesori i njohur i Harvardit, Avi Loeb, i cili është bërë i famshëm për teoritë e tij rreth kontakteve të mundshme me civilizime aliene. Ai ka deklaruar se karakteristikat e 3I/ATLAS janë të pazakonta dhe nuk përputhen plotësisht me ato të një komete apo asteroidi të zakonshëm, për shkak të trajektores, shpejtësisë dhe sjelljes së tij në hapësirë.
A është 3I/ATLAS një anije kozmike aliene?
Ndërsa një pjesë e komunitetit shkencor është e përmbajtur në konkluzione, duke e konsideruar objektin një asteroid ose kometë me origjinë natyrore, të tjerë nuk e përjashtojnë mundësinë që kemi të bëjmë me një objekt të krijuar ose i lëshuar nga një civilizim tjetër, siç ka sugjeruar edhe vetë Loeb në publikimet e tij të fundit.
Sipas të dhënave të deritanishme nga NASA, 3I/ATLAS do të arrijë pikën më të afërt me Diellin më 30 tetor 2025, duke u ndodhur në një distancë prej rreth 210 milionë kilometrash, dhe do të qëndrojë brenda orbitës së Marsit. Pritet që në nëntor 2025 të i afrohet Tokës, por agjencia hapësinore amerikane ka qetësuar opinionin publik duke deklaruar se objekti nuk përbën kërcënim real për planetin tonë dhe do të kalojë në një distancë të sigurt.
Megjithatë, ky informacion nuk ka mjaftuar për të ndalur spekulimet dhe teoritë konspirative që qarkullojnë gjerësisht në rrjet, ku shumë përdorues po lidhin parashikimin e Baba Vangës për “vizitorë nga kozmosi” në vitin 2025, me afrimin e 3I/ATLAS si një dëshmi që profecia po përmbushet.
Spekulim, realitet, apo paralajmërim?
Historia e Baba Vangës është e mbushur me parashikime që, sipas ndjekësve të saj, janë realizuar – përfshirë rënien e Kullave Binjake më 2001, Brexit-in dhe krizën e COVID-19. Megjithatë, mospasja e dokumenteve të sakta dhe interepretimet shpesh të lira e kanë vendosur figurën e saj në kufirin mes mitit dhe realitetit.
Ndërsa 2025-a ka kaluar gjysmen e saj, do të duhet të presim të shohim nëse objektet si 3I/ATLAS do të na japin përgjigje mbi jetën jashtëtokësore, apo do të mbeten thjesht kuriozitete astronomike. Ajo që është e sigurt, është se Baba Vanga vazhdon të mbetet një figurë që sfidon kohën, dhe çdo “përputhje” me ngjarjet e ardhshme – qofshin ato reale apo të perceptuara – do të vazhdojë të mbajë gjallë misterin e saj.
Derisa ta zbulojmë se çfarë përfaqëson vërtet 3I/ATLAS, njerëzimi mbetet me sytë nga qielli – midis frikës, kuriozitetit dhe… ndoshta, profecisë.
