Kryeministri Edi Rama po e bën gati zarfin e shumëpritur me emrat e skuadrës së tij të katërt qeverisëse, që do të shpallet në mbledhjen e asamblesë socialiste më 11 shtator, ora 10:00. Në këtë takim do të vendoset për kabinetin e ri, por edhe për postin e zëvendëskryeministrit, kryetarit të parlamentit dhe kreun e grupit parlamentar, duke shpalosur njëherazi prioritetet e qeverisë për katër vitet e ardhshme. Burime pranë PS thonë se Rama po synon një kombinim mes figurave me profil teknik dhe emrave që nuk bartin mbi shpinë dosje problematike në SPAK. Kjo ka shtuar ethet mes ministrave aktualë, sepse askush nuk e di me siguri nëse do të vijojë të qëndrojë në detyrë. Dhe pikërisht këtu nis dilema më e madhe: një pjesë e kabinetit aktual është e mbërthyer nga hetime të rënda në SPAK. Nga Belinda Balluku, Taulant Balla e Ulsi Manja, tek Ogerta Manastirliu, Arbjan Mazniku, Mirela Kumbaro e Pirro Vëngu, të gjithë rezultojnë me dosje të hapura apo në hetim, çka i bën ata kandidatët më të rrezikuar për të mos qenë pjesë e qeverisë “Rama 4”. Gjithashtu mësohet se ministri Ervin Hoxha dhe Petrit Malaj nuk konsiderohen më në rrezen e Ramës.
Kush janë ministrat me dosje në SPAK
Belinda Balluku-Ministrja e Infrastrukturës është përfolur për tendera të dyshimtë dhe koncesione me vlerë marramendëse. Një numër hetimesh kanë nisur në SPAK për mënyrën se si janë ndarë fondet publike. SPAK ka zbardhur qindra përgjime që implikojnë Ballukun në batërdinë miliona euro që bashkë me drejtorët e saj të arrestuar dhe nën hetim i kanë bërë dhe po i bëjnë buxhetit të shtetit. Madje hetimet e aferës së Tunelit të Llogarasë nga SPAK janë drejt fundit. Kjo dosje “gropos” Belinda Ballukun. Ekzistojnë të dhëna, përfshirë dëshmitë publike të Arben Ahmetajt, një prej pjesëmarrësve në takim, se kompania fiktive turke u paracaktua si fituese në një takim në Ankara, Turqi, të zhvilluar në datën 3 Qershor 2021, pra 21 ditë para rishpalljes së tenderit. Aty u bë pazari ku me një të rënë të lapsit, Balluku i shkaktoi 50 milionë euro dëm buxhetit të shtetit shqiptar. Kjo është një nga dhjetëra dosje që ka të hapura Balluku në SPAK.
Ulsi Manja – Si ministër i Drejtësisë, ai ndodhet në një pozicion paradoksal: nga njëra anë, është përgjegjës për drejtësinë dhe nga ana tjetër, përmendet në çështje të dyshimta që mund ta bëjnë atë klient të saj. Dosjet e tij nuk janë të pakta në SPAK, duke nisur nga ato për manipulimet elektorale e duke përfunduar tek denoncimet që janë bërë së fundmi ndaj tij. Madje thuhet se emri i tij ka dalë edhe nga zbardhja e përgjimeve SKY, program i cili përdorej nga kriminelët.
Ogerta Manastirliu – Ministrja e Arsimit është nën hetim për tendera të zhvilluar në emergjencë dhe për kontrata të dyshimta kur drejtonte sektorin e shëndetësisë. Gjatë gjithë karrierës së saj, Manastirliu ka qenë pjesë e disa prej skandaleve më të mëdha të administratës publike, që kanë ngritur dyshime të forta për lidhje të errëta me korrupsionin dhe pastrimin e parave. Pas çdo pozite të rëndësishme që ka mbajtur, nga Drejtoresha e QSUT-së deri në Ministren e Shëndetësisë dhe Arsimit, ka pasur një varg skandalesh që e kanë pasuruar “CV-në e saj të zezë” dhe kanë ngjallur aludime për shpërdorim të pushtetit dhe abuzime të mëdha me fondet e shtetit. Gjithashtu Manastirliu është paraqitur në SPAK, për rolin e saj në aferën e sterilizimit, në kohën kur ka qenë drejtoreshë e QSUT dhe më pas Ministre e Shëndetësisë. Manastirliu, nyja e aferave në shëndetësi, u është përgjigjur dy orë pyetjeve të hetuesve të dosjes së koncensionit të sterilizimit. Po ashtu Manastirliu po hetohet edhe për aferën e laboratorëve, të cilët prej vitit 2020 janë dhënë me koncesion për 10 vite.
Arbjan Mazniku – Ish-zëvendëskryetari i Bashkisë së Tiranës është përfolur për favorizime në tendera dhe lidhje me biznese të mëdha që kanë përfituar nga fondet publike. Gazeta ka mësuar se Mazniku është thirrur kohët e fundit disa herë për të dëshmuar në SPAK. Madje raportohet se shtëpia e tij është kontrolluar nga agjentët e Byrosë Kombëtare të Hetimit. Një investigim i mëparshëm i BIRN ngrinte hije dyshimi mbi Maznikun për një konflikt të mundshëm të interesi në lidhje me aktivitete të bashkisë të kryera në një restorant në Tiranë në pronësinë e tij familjare si dhe lidhjet me një tender të kompanisë publike, Tirana DC në kohën që drejtohej nga Redi Molla. Por jo vetëm kaq, SPAK ka të tjera materiale që pritet të tronditin pozitat e tij.
Taulant Balla –Ministër i Marrëdhënieve për Shtetin dhe Parlamentit i ka llogaritë e hapura me drejtësinë. Në muajin prill 2024, Balla ka qëndruar prej më shumë se 1 orë brenda SPAK. Dosja që e ka mbajtur dhe vazhdon ta përndjekë prej kohësh është ajo e aferës “Toyota Yaris”, e cila po hetohet edhe nga belgët. Janë pyetur shumë dëshmitarë dhe shkëmbyer letër-porosi mes SPAK dhe Belgjikës pikërisht për këtë çështje, por edhe për grupe të tjera kriminale të lidhura me politikën. Belgët madje kanë zbarkuar edhe në Shqipëri për të hetuar nga afër situatën. Për të avancuar hetimet, prokurorët thirrën edhe gazetarin Artan Hoxha në vitin 2022 në Belgjikë. Këto fakte i konfirmoi dhe denoncuesi i kësaj dosjeje nga Lulzim Basha, i cili ka thënë disa kohë më parë se “jam njeriu më informuar pas Ramës. Unë di më shumë se kaq. Nuk flas dot më shumë sepse dosja Toyota Yaris është në hetim. Po hetohen edhe anëtarët e mazhorancës.” Nga ana tjetër, ka akuza nga opozita se Balla po hetohet nga SPAK pasi ka dalë në përgjimet e SKY ECC duke favorizuar dhe bashkëpunuar me banda kriminale.
Mirela Kumbaro – Ministrja e Mjedisit është përfshirë në hetime që lidhen me abuzimet në administrimin e pasurive natyrore dhe kontratat e dhëna për shfrytëzimin e tyre. Në kontrabandën e mbetjeve metalike toksike, që kompania turke “Kurum” në bashkëpunim me kompaninë “Sokolaj Sh.p.k” eksportoi në Kinë e Tajlandë, del e përfshirë Kumbaro me licencën e paligjshme mjedisore që i dha. Prokuroria e Durrësit ka nisur hetimin për këtë skandal. Dyshohet se në regjistrin e licencave mjedisore të kategorisë “III.2.B” që janë dhënë gjatë vitit 2022, mungon vetëm dosja me aplikimin, studimin teknik-mjedisor dhe licencën që i është dhënë kompanisë “Sokolaj Sh.p.k” për eksport-import mbetjesh të rrezikshme. Prokuroria pritet të zbulojë nëse Mirela Kumbaro e ka dhënë ilegalisht dhe nuk e ka regjistruar lejen; ose e ka hequr pas plasjes së skandalit të mbetjeve, apo pasi u publikua leja. Prova fiktiviteti në lejen që ka firmosur Mirela Kumbaro, është mungesa e afatit kohor të aktivitetit import-eksport, dhe marrja e kompetencave të Drejtorit të Agjencisë Kombëtare të Mjedisit. Skandali i mbetjeve, përforcon bindjen, se ministrja Mirela Kumbaro, është “kumbara” e shumë aferave gjatë periudhës shtator 2013- dhjetor 2018 kur ishte Ministre e Kulturës dhe prej shtatorit 2021 që është Ministre e Turizëm-Mjedisit. Emri “Mirela Kumbaro”, ka dalë në 23 afera të rënda shkatërruese për kulturën, mjedisin e turizmin, por dhe me dëme financiare e pasurore afro 2 miliardë euro sipas KLSH e Auditeve të Ministrisë së Financave, shkaktuar me vendimet dhe urdhrat e saj në pazaret që ka bërë.
Pirro Vengu-Ministër i Mbrojtjes: Para disa kohësh ka ndodhur një aksion të Byrosë Kombëtare të Hetimit (BKH) në Portin e Durrësit, i udhëhequr nga SPAK, për të hetuar kontratën e terminalit të kontenierëve. Kjo kontratë, e nënshkruar nga ish-drejtori i Autoritetit Portual Durrës (APD), Pirro Vëngu, aktualisht ministër i Mbrojtjes, është në qendër të hetimeve për dyshime abuzimi. Në vitin 2021, APD i dha një koncesion 5-vjeçar kompanisë malteze Hili Limited për operimin e terminalit të kontenierëve, me vlerë 31 milionë euro. Sipas kushteve fillestare, kompania duhej të siguronte pajisje me fondet e veta, por dyshohet se këto kosto iu ngarkuan APD-së, duke favorizuar kompaninë private. Kjo situatë ka çuar në hetime të thelluara nga SPAK, përfshirë sekuestrimin e dokumentacionit dhe marrjen në pyetje të anëtarëve të Komisionit të Vlerësimit të Ofertave.
