Një ngjarje e rëndë dhe tronditëse ka shokuar Meksikën, ku një familje e tërë është gjetur e ekzekutuar në rrethana ende të paqarta. Viktima është influencerja e njohur e TikTok-ut, Esmeralda Ferrer Garibay, vetëm 32 vjeçe, e cila humbi jetën së bashku me bashkëshortin e saj Roberto Carlos Gil Licea, 36 vjeç, dhe dy fëmijët e tyre, Gael Santiago, 13 vjeç, dhe vogëlushen Regina, vetëm 7 vjeçe.
Trupat e katër anëtarëve të familjes u gjetën brenda një furgoni tip Ford Ranger ngjyrë gri, që ishte braktisur në qytetin Guadalajara të shtetit Jalisco. Zbulimi i tmerrshëm u bë të premten e kaluar, por vetëm një ditë më parë autoritetet konfirmuan zyrtarisht identitetin e viktimave. Pamjet nga vendi i ngjarjes treguan një atmosferë të rëndë, ku policia dhe ekspertët kriminalistikë punuan për disa orë me radhë për të mbledhur prova.
Familja kishte pak muaj që ishte shpërngulur nga Michoacán në zonën metropolitane të Guadalajarës për arsye pune. Roberto ishte i angazhuar me tregtinë e automjeteve dhe me kultivimin e domateve në vendlindjen e tij, një aktivitet që sipas hetuesve mund të ketë sjellë konflikte biznesi apo përplasje me grupe të tjera, duke u bërë kështu një pistë e fortë e hetimit.
Ndërkohë, Esmeralda Ferrer Garibay, e njohur në rrjete sociale me pseudonimin Esmeralda FG (@esmeraldafg222), kishte ndërtuar një profil të ndjekur nga dhjetëra mijëra persona. Ajo publikon kryesisht video me përmbajtje mbi stilin e jetesës, udhëtime dhe muzikë, përfshirë edhe lip-sync me këngë “narkokorrido”, balada që lidhen shpesh me botën e drogës dhe figurat e kartelëve, një fakt që tashmë është futur gjithashtu në fokus të hetimeve.
Vrasja makabre e saj dhe e familjes ka shkaktuar një valë reagimesh të forta në opinionin publik meksikan, ku gjithnjë e më shpesh viktima të dhunës së organizuar apo të konflikteve kriminale bëhen personazhe publikë dhe influencues në rrjetet sociale. Miqtë dhe ndjekësit e Esmeraldës kanë shprehur dhimbje dhe indinjatë, duke kërkuar drejtësi për të dhe familjen e saj.
Autoritetet në Jalisco dhe Michoacán kanë njoftuar se janë duke bashkëpunuar për zbardhjen e ngjarjes, ndërsa hetimet mbeten të hapura mbi lidhjet e mundshme mes aktivitetit të burrit të saj dhe rrethit të dhunës që përfshin rajonet e njohura për konfliktet e kartelëve.
Ky rast e ka futur Meksikën në një tjetër debat mbi sigurinë publike dhe rrezikun e madh me të cilin përballen familjet e zakonshme, të kapura mes dhunës së përditshme dhe ndikimit të botës së krimit të organizuar.
