Detaje të reja janë zbuluar lidhur me atentatin e regjistruar një ditë më parë në kryeqendrën e veriut, Shkodër, ku i riu Kristian Kola u ekzekutua në qendrën e qytetit.
Burime për mediat bëjnë me dije se 34-vjeçari kishte parkuar automjetin e tij para lokalit te “Kinema Republika” dhe ishte futur brenda lokalit për të takuar mikun e tij.
Thuhet se aty kishte qëndruar për vetëm disa minuta, ndërkohë që jashtë e priste i parkuar një motor i zi. Sapo Kola kishte dalë jashtë, njëri prej personave që ndodhej në motor e qëlloi nga distancë e afërt me armë silenciator.
Sipas policisë, vrasësi dyshohet të ketë qenë profesionist, pasi ka qëlluar drejt dhe në objektiv, edhe pse shumë pranë Kolës ndodhej shoku i tij.
Nga të dhënat e deri tanishme mësohet se dy autorët kanë qenë me motor, të maskuar me skafandra dhe të veshur me të zeza. Ata pritën Kolën të dilte nga lokali dhe pasi e qëlluan u larguan me shpejtësi drejt periferisë së qytetit.
Teksa policia po punon për zbardhjen e plotë të kësaj ngjarje, disa persona janë shoqëruar në Komisariat, ndërkohë që dyshohet se në ndihmë të dy autorëve të ketë ardhur dhe një person i tretë roli i të cilit ka qenë vëzhgimi i lëvizjeve të “objektivit”.
Mbrëmjen e së enjtes, qyteti i Shkodrës u trondit nga tjetër atentat mafioz. I riu Kristian Kola, teksa qëndronte jashtë ambienteve të një lokali te “Kinema Republika”, u qëllua me breshëri plumbash nga dy persona me motor.
Si pasojë e plagëve të marra 34-vjeçari humbi jetën në vendin e ngjarjes. Ngjarja e rëndë u regjistrua rreth orës 22:30, ku dy autorët me motor dhe skafandra në kokë iu afruan Kolës, i cili ishte duke pirë kafe në ambientet e jashtme të lokalit dhe hapën zjarr ndaj tij.
Pasi e qëlluan disa herë, dy autorët u larguan nga vendi i ngjarjes me shpejtësi “skëterrë”, ndërkohë që trupi i Kristianit i bërë “shoshë” nga plumbat mbeti në bulevard.
Burime për mediat bënë me dije më herët se plumbat e kapën të riun në pjesën e gjoksit dhe fatkeqësisht rezultuan fatale. Po ashtu, nga informacionet e siguruara nga Policia e kryeqendrës së veriut, Kola nuk rezulton një person me precedentë të mëparshëm kriminal.
Ky fakt është konfirmuar së fundmi edhe nga gazetari Arben Çokaj i cili njihte nga afër 34-vjeçarin. Përmes një postimi në rrjetin e tij social “Facebook”, Çokaj shkruan se Kristiani ishte një djalë i mirë dhe se nuk merrej me punë të dyshimta.
Sipas gazetarit, ai së bashku me të atin kishin një firmë ndërtimi dhe se përgjatë këtyre ditëve ishin duke shtruar me pllaka përreth Kinemasë Milenium, aty ku dhe ndodhi ngjarja e rëndë.
Madje, jo më larg se një ditë para se të ndodhte atentati, Çokaj ishte takuar me 34-vjeçarin ku ky i fundit i kishte treguar dhe dëshirën e tij për të blerë një makinë.
“Sonte, një motorr me 2 njerëz kalojnë te Hotel Golden Palacë, ku po rrinte aty jashtë Kristian Kola, 34 vjeç dhe e vrasin në vend, rreth orës 22:30…
Sa e lirë dhe e pavlerë është jeta këtu në Shkodër e në Shqipëri. A do reagoni o njerëz një ditë, para se të shuheni? Si vritet tjetri kot së koti ashtu?!
Kristianin ka kohë që e njoh, djalë shumë i mirë, nuk e di se është marrë me punë të dyshimta, me të atin kishin një firmë ndërtimi, dhe këto ditë ishin duke shtruar pllakat përreth Kinemasë Milenium në Shkodër, aty përballë ku i ndodhi edhe kjo ngjarje kaq e tmerrshme. Dje në drekë Kristiani më tha se jam ba me ble një makinë të re dhe ashtu bëmë humor pak.
Uroj që vrasësit e ata që qëndrojnë pas këtij krimi makabër të gjenden sa më shpejt nga policia! Kanë luajtë mendsh njerëzit, merruni more vesh, pse vriteni kështu, o tupa! Vëreni trurin në punë se nuk është turp”, shkruan ai.
Prej mbrëmjes së djeshme Shkodra është futur në shtetrrethim, ku forca të shutma Policia kanë bllokuar hyrjet dhe daljet e qytetit verior dhe po puojnë për zbardhjen e plotë të kësaj ngjarje të rëndë kriminale. Mësohet se zona ku dhe ndodhi atentati është e mbuluar me kamera sigurie, të cilat do të ndihmojnë grupin hetimor për të zbardhur dinamikën e plotë të ngjarjes dhe për të rënë në gjurmën e autorëve, të cilët deri më tani nuk janë identifikuar.
“Rreth orës 22:30, në lagjen “Vasil Shanto”, në rrethana ende të paqarta, dy shtetas ende të paidentifikuar dyshohet se kanë vrarë me armë zjarri shtetasin K. K., 34 vjeç, i cili ishte në ambientet e jashtme të një lokali.
Shërbimet e Policisë kanë shkuar menjëherë në vendngjarje, janë ngritur pika kontrolli në dalje të qytetit dhe vijojnë kontrollet në zonë e në ambiente të ndryshme, për kapjen e autorëve.
Ndërkohë, është ngritur një grup i posaçëm hetimor, i cili, nën drejtimin e Prokurorisë, po punon intensivisht për sqarimin e rrethanave, dokumentimin ligjor, si dhe për identifikimin dhe kapjen e autorëve”, njoftoi Policia mbrëmjen e djeshme.
