Gjatë fjalimit të mbajtur këtë të mërkurë në mbledhjen e organizuar në selinë e Partisë Socialiste, kryeministri Edi Rama paralajmëroi për një katarsis në bashkinë e Tiranës.
“Drejtuesja e komanduar ka bërë gjithçka ka mundur në kushtet që operon. Nevoja për të legjitimuar udhëheqjen e Bashkisë është çdo ditë e më urgjente. Mjafton të shohësh situatën dramatike me prokurimet publike që janë në nivelin më historik, apo rënien dramatike të realizimit të investimeve. Nuk mundet të presë më gjatë. Kjo, shtuar domosdoshmërisë për një proces katarsisi burimor, në kuptimin e vetëpastrimit të Bashkisë Tiranë, ashtu siç bëmë dhe po bëjmë me bashkitë e tjera, që Tirana e ka po aq të nevojshme, kërkon legjitimim të udhëheqjes së re të Bashkisë së Tiranës, në mënyrë që mos kemi situata ku hapësirat publike rezultojnë të zëna nga punonjës apo nga drejtues të njësive vendore, që është një gjë e tmerrshme. Dhe ne do e adresojmë në ligjin e ri, në paketën e re që do kalojmë në qeveri, që sjell edhe ndëshkimin e rëndë penal për ata që paguhen nga taksat e qytetarëve dhe që shkelin ligjin”, tha Rama.
Mes të tjerash, ai foli edhe për transportin në Tiranë, çështje për të cilën ai u shpreh se qytetarët duan zgjidhje. Kështu, kryeministri theksoi nevojën për përmirësimin e këtij transporti jo vetëm në qendër të Tiranës, por dhe në zonat rurale të saj.
“Po ashtu qytetarët duan zgjidhje për cilësinë e transportit urban në Tiranën e madhe, jo vetëm në Bashkinë e qytetit, domethënë në pjesën urbane, por në pjesën rurale, ku ka problematika serioze për këtë punë”, tha ai.
Në mbledhjen me deputetët dhe ministrat, Rama thumboi opozitën për sulmet dhe shpifjet sipas tij ndaj Veliajt, por tha se ai nuk komenton proceset e drejtësië.
Rama prezantoi Ogerta Manastirliun dhe u shpreh optimist për fitoren, sipas sondazheve të kryera prej tyre në Tiranë.
“Pas 7 muajsh pa një kryetar bashkie të votuar në krye të detyrës dhe po ashtu pa një kryetar bashkie të dënuar nga drejtësia në lidhje me detyrën, u detyruam të marrim një hap të debatueshëm por të detyrueshëm për fatin e kryeqytetit të Shqipërisë. Këshilli bashkiak, për t’i hapur rrugë zgjedhjeve të reja dhe rindëzjes me orë të plota të makinerisë së Bashkisë Tiranë.
Janë thënë dhe llomotitur shumë gjëra lidhur me këtë hap, por nuk ia vlen të merremi as me ata të cilëve iu ka rënë Diella në kokë, as me ata të cilët shumica parlamentare detyrohet të kalojë në votimin e programit, pasi ndalohet t’ja paraqesë programin me metodat famëkeqe të rrylave të fytit dhe bërrulave në sallën e Kuvendit, dhe as me ata që tre herë rresht nuk e mundën dot Erionin me karikaturat e tyre mediatike që sot fryjnë gjokset me sebepinë një letre anonime ndaj një kundërshtari me duar të lidhura dhe këmbë.
Qoftë tezgat dhe pasqyrat lincuese ndaj tij, qoftë procesi i drejtësisë kundër tij nuk janë tema ku ne mund të ndërhyjmë si palë. Tema jonë si palë e përgjegjshme në jetën e këtij vendi, është që mos të marrë peng pafundësisht kryeqytetin e Shqipërisë dhe punët e tij.
Tema jonë është që të adresojmë pa humbur kohë boshllëkun përditë e më të dëshpëruar në Bashkinë e Tiranës. Qytetarët e Tiranës nuk mund të bashkëjetojnë me një Bashki kokë-këputur. Krahas të gjitha punëve të tjera, të nisim punën për zgjedhjet e reja në Tiranë. Ku me kandidaten e duhur, me angazhimin e duhur do të marrim rezultatin e duhur. Edhe në anketimin që kemi bërë ditët e fundit enkas për Tiranën, është e qartë që qytetarët nuk e kanë mendjen në ndonjë kandidat, por e kanë te problematikat që kërkojnë zgjidhje.”, tha Rama.
