Deputetja e njohur e Kuvendit të Kosovës dhe ish-kryetarja e Grupit Parlamentar të Lëvizjes Vetëvendosje, Mimoza Kusari-Lila, është bërë sot pjesë e një reagimi të gjerë publik, pasi në një postim të publikuar në rrjetin social Facebook ajo është shprehur krenare që ka ditëlindjen në të njëjtën datë me ish-udhëheqësin komunist shqiptar, Enver Hoxha.
Sot, më 16 tetor, Kusari-Lila ka shënuar ditëlindjen e saj, por mënyra si e ka kujtuar këtë datë ka ngjallur reagime të menjëhershme në opinionin publik kosovar e shqiptar, për shkak se ndër figurat që ajo ka përmendur në urimin e saj përfshihet edhe ish-diktatori i Shqipërisë, Enver Hoxha, i cili për dekada udhëhoqi me dorë të hekurt regjimin komunist në vend.
Në statusin e saj, deputetja ka bërë një listë emrash që, sipas saj, ndajnë të njëjtën ditëlindje, duke e shoqëruar postimin me tone humoristike.
Ajo ka shkruar:
“5 me 50, pa dallim 😀 Ismail Qemali, Enver Hoxha, Aurela Gaçe, Dritan Hoxha, Donika Gërvalla, Fikrim Damka, Duda Balje, Oscar Wilde… krejt një ditëlindje mbajmë, 16 tetor 😉. Urime të gjithëve!”
Në listë ajo ka përfshirë figura të ndryshme historike dhe bashkëkohore, si Ismail Qemali, themelues i shtetit shqiptar; këngëtarja Aurela Gaçe; themeluesi i “Top Media” Dritan Hoxha; ministrja e Jashtme e Kosovës Donika Gërvalla; deputetet Duda Balje dhe Fikrim Damka; si dhe shkrimtari i famshëm irlandez Oscar Wilde.
Por përmendja e Enver Hoxhës, përkrah figurave të tjera, ka bërë që postimi të interpretohet si një gafë politike dhe mungesë kujdesi publik, sidomos duke marrë parasysh ndjeshmërinë që ekziston në Shqipëri dhe Kosovë ndaj trashëgimisë së regjimit komunist.
Në rrjetet sociale janë shpërndarë me dhjetëra komente që e kritikojnë deputeten, duke theksuar se përmendja e një diktatori që la pas viktima, burgime dhe shtypje, nuk mund të jetë objekt krenarie, as ironie. Disa qytetarë kanë komentuar se “humori nuk ka vend kur përmendet emri i Enver Hoxhës”, ndërsa të tjerë kanë ironizuar duke thënë se “ndoshta deputetja nuk e ka ditur se çfarë përfaqëson Enveri për historinë shqiptare”.
Megjithatë, kishte edhe zëra që e kanë mbrojtur Kusari-Lilën, duke thënë se postimi i saj ishte thjesht një urim simbolik, ku ajo renditi disa emra të njohur që ndajnë të njëjtën datë, pa ndonjë prapavijë politike apo nostalgji.
