Uragani Melissa i afrohet bregut, alarm në të gjithë vendin
Uragani Melissa është vetëm pak minuta larg zbritjes zyrtare në tokë dhe po përgatitet të godasë Xhamajkën me fuqi shkatërruese. Stuhia, tashmë në kategorinë 5, është klasifikuar si e dyta më e fortë në historinë e Atlantikut, me erëra që arrijnë 185 milje në orë (rreth 297 km/orë) dhe presion ekstrem prej 892 milibarësh në qendër.
Qendra e uraganit ndodhet vetëm disa kilometra nga bregu jugor i Xhamajkës dhe pritet që brenda pasdites të zbresë plotësisht në tokë. “Syri” i stuhisë po afrohet me shpejtësi në drejtim veri-verilindje, me rreth 11 km/orë, duke sjellë me vete reshje të dendur, erëra shkatërruese dhe valë që po godasin bregdetin me lartësi deri në 4 metra.
Autoritetet kanë shpallur gjendje emergjente kombëtare dhe kanë urdhëruar evakuime masive në zonat bregdetare dhe malore. Mbi 500 strehimore publike janë hapur në të gjithë vendin, ndërsa ushtria dhe forcat e shpëtimit po punojnë pa ndërprerje për evakuimin e qytetarëve.
Rrjeti elektrik është ndërprerë në më shumë se 70% të vendit, dhe raportimet nga Kingston flasin për rrugë të përmbytura, pemë të rrëzuara dhe dëme serioze në infrastrukturë.
Meteorologët paralajmërojnë se Xhamajka do të përballet me reshje ekstreme deri në 1000 mm në disa zona, duke rritur rrezikun e rrëshqitjeve të dheut dhe vërshimeve të menjëhershme. Përmbytjet pritet të prekin veçanërisht jugun dhe lindjen e ishullit, ku terreni malor e përkeqëson situatën.
Stuhia po sjell një kombinim të rrallë të erërave ciklonike, valëve të larta dhe shtrëngatave elektrike, që mund të shkatërrojnë linjat elektrike, shtëpitë dhe rrugët e komunikimit.
Kryeministri Andrew Holness ka paralajmëruar qytetarët të mos dalin nga shtëpitë dhe të ndjekin udhëzimet e mbrojtjes civile. Forcat e emergjencës janë vendosur në gatishmëri të plotë, ndërsa spitalet janë pajisur me gjeneratorë dhe rezerva mjekësore.
Qeveria ka kërkuar ndihmë ndërkombëtare, dhe ekipet e Kryqit të Kuq, Agjencisë për Menaxhimin e Fatkeqësive dhe organizatave të tjera humanitare janë vendosur në zonat më të rrezikuara për të ofruar ndihmë sapo kushtet ta lejojnë.
Pas kalimit mbi Xhamajkë, Melissa pritet të vazhdojë drejt Kubës lindore dhe më pas Bahamave, ku pritet të ruajë një pjesë të fuqisë së saj. Parashikimet tregojnë se edhe nëse dobësohet në kategori 4, do të mbetet një nga stuhitë më të fuqishme të këtij viti në Atlantik.
Lëvizja e ngadaltë e uraganit Melissa nëpër Xhamajka është një nga arsyet pse konsiderohet kaq i rrezikshëm.
Dr. Mattheë Sitkowski, redaktor shkencor në The Weather Channel shprehet se Melissa aktualisht po lëviz me shpejtësi rreth 8 mph.
“Kjo do të thotë një kohë më e gjatë me erëra shumë të forta. Kjo do të thotë që reshjet do të kenë më shumë kohë për t’u grumbulluar. Jemi shumë të shqetësuar për situatën e përmbytjeve dhe rrëshqitjeve të dheut në ishull.“, i thotë ai prezantuesit kryesor Mark Austin .
Dr. Sitkowski thotë se nuk ka pasur shumë uragane të rënda që kanë kaluar drejtpërdrejt mbi Xhamajkë më parë, duke e bërë Melissën një “stuhi veçanërisht historike dhe shkatërruese”
A do të shkaktojë ndryshimi i klimës më shumë uragane si Melissa?
“Mendoj se ndoshta do të ketë disa studime posaçërisht për Melissën për të provuar të analizojnë rolin e ndryshimeve klimatike këtu“, shprehet Dr. Sitkowski.
“Mund t’ju them se ky është uragani i tretë i Kategorisë 5 që kemi pasur këtë sezon dhe ka pasur disa prova se disa nga stuhitë më të forta po bëhen më të forta dhe më të shpejta. Sigurisht që kemi parë shumë intensifikim të shpejtë. Melissa nuk bën përjashtim atje… Temperaturat e ngrohta të oqeanit sigurisht që luajtën rol këtu.”– shton më tej ai.
