Të tjera detaje të rënda janë zbardhur në lidhje me masakrën e ndodhur në Malishevë, ku Astrit Isufi vrau vëllezërit e bashkëshortes së tij.
Mediat në Kosovë kanë zbardhur dënimin që Isufi ka marrë në muajin prill për dhunën që k ushtruar ndaj bashkëshortes.
Gjykata Themelore në Prishtinë, dega Drenas, më 16 prill 2025 ka dënuar me 154 ditë burgim dhe 800 euro gjobë, ndërkaq Gjykata e Apelit më 26 qershor 2025 kishte ndryshuar këtë vendim, duke dënuar Isufin me 3 muaj burgim dhe 800 euro gjobë.
Prokuroria Themelore në Prishtinë më 7 prill 2025 kishte ngritur aktakuzë ndaj Isufit për veprën penale dhunë në familje dhe kanosje.
Sipas aktakuzës të cituar në vendim të gjykatës, thuhet se Isufi më 30 mars 2025 me dashje dhe qëllim të cenimit të dinjitetit kishte ushtruar dhunë fizike dhe psikologjike.
Sipas dosjes, ai e kishte goditur gruan me peshqir, e kishte sulmuar me shuplaka disa herë, i ka hedhur pjatën e ushqimit në fytyrë e po ashtu e ka ngritur në ajër duke e futur në dhomë duke e lidhur me kabëll elektrik.
Më tej zbulohet se Isufi i është drejtuar me kërcënime bashkëshortes duke i thënë se do i vriste familjen nëse ajo ndahej nga ai.
“Ti nuk guxon me mu nda mua, se kam me të vra familjen ka me ti faruar krejt”-, thuhet në dosje.
Pas një operacioni intensiv kërkimi që zgjati gjatë gjithë natës, Policia e Kosovës ka vënë në pranga autorin e dyshuar të vrasjes së dyfishtë që tronditi Malishevën një ditë më parë.
I arrestuari është identifikuar si Astrit Isufi, i cili dyshohet se ekzekutoi me armë zjarri vëllezërit Naim dhe Driton Morina, në derën e shtëpisë së tyre, në një moment kur familja ishte në zi për humbjen e babait.
Sipas Policisë, arrestimi u krye mëngjesin e sotëm, rreth orës 06:30. I dyshuari është gjetur i plagosur dhe është dërguar menjëherë për trajtim në QKUK.
“Po sot, rreth orës 06:30, është arrestuar i dyshuari. Ai ka qenë i plagosur, pas ndihmës së parë që i është dhënë, është dërguar për trajtim në QKUK,” – deklaroi drejtori rajonal i Policisë së Gjakovës, Lumni Graishta.
Ende nuk është bërë e qartë se në ç’rrethana është plagosur Astrit Isufi, ndërsa hetimet vazhdojnë për të përcaktuar nëse ai ka tentuar të vetëvritet pas kryerjes së krimit.
Ngjarja ndodhi të enjten paradite, rreth orës 11:00. Sipas familjarëve, Astriti qëlloi për vdekje dy vëllezërit e gruas së tij para syve të njerëzve, vetëm pak ditë pas varrimit të babait të tyre.
“Familja ende ishte duke pritur njerëz për ngushëllim. Ai u kthye dhe i vrau para syve tanë. Edhe babën e kishim varrosë para pak ditësh,” – tregoi një i afërm i familjes për mediat.
Ky krim i rëndë ka tronditur opinionin publik dhe është cilësuar si një ndër rastet më të rënda të ditëve të fundit në Kosovë
