Krahas shumë festave të shqiptarëve nëpër vende të ndryshmë të botës një paradë ishte planifikuar të mbahej edhe në Londër me rastin 28 Nëntorit, por ajo nuk u zhvillua.
Shkak u bë Policia Metropolitane e Londrës e cila nuk lejoi të bëheshin festime.
Policia nuk lejoi as muzikën, as instrumentet muzikore dhe festive.
Forca të shumta të policisë së Londrës i rrethuan dhe nisen ndalimin e shqiptarëve.
Presidenti Bajram Begaj zhvilloi mbrëmjen e së premtes një ceremoni në Presidencë me rastin e 113-vjetorit të Pavarësisë së vendit.
Në fjalën e tij, kreu i shtetit tha se, pas më shumë se një shekulli si shtet i pavarur, Shqipëria ka krijuar sot një imazh serioz në arenën ndërkombëtare dhe është bërë një partner i besueshëm i fuqive rajonale, por edhe atyre të mëdha botërore.
Rëndësi të veçantë presidenti Begaj i kushtoi diasporës shqiptare, për të cilën tha se është një urë e fuqishme me botën.
“Diaspora është zemra jonë që rreh larg, detyra jonë si shtet është t’i dëgjojmë, t’i përfshijmë dhe t’u krijojmë hapësira reale pjesëmarrjeje. Shqipëria ka fituar besueshmëri si vend që kontribuon në paqen, sigurinë dhe dialogun. Shqipëria mbetet e besueshme për aleatët euroatlantikë. Ne jemi krenarë për lidhjen me Shtetet e Bashkuara të Amerikës. Fatet tona u ndanë kundër dëshirës sonë, sot fati i Shqipërisë, i Kosovës dhe i gjithë shqiptarëve në rajon është në duart tona. Çdo arritje e Kosovës dhe e komuniteteve shqiptare në rajon është krenari për ne. Sot, kudo ku jetojnë shqiptarët, është ditë feste. Është koha të jemi bashkë, të mbështesim zhvillimin e komuniteteve shqiptare dhe të punojmë që çdo shqiptar, brenda e jashtë vendit, të ndihet pjesë e një kombi që ecën përpara. Pavarësia matet me cilësinë e shërbimeve publike, me drejtësinë funksionale, me mundësinë që u ofrojmë të rinjve dhe dashurinë për atdheun. Këto janë sfidat që na bashkojnë, pavarësisht bindjeve tona politike”, – tha Begaj.
