Ish-kryeministri i Malajzisë, Najib Razak, u dënua të premten me 15 vjet burg shtesë dhe një gjobë prej 2.8 miliardë dollarësh për abuzim me pushtetin dhe pastrim parash, në kuadër të gjyqit më të madh të skandalit multimiliardë dollarësh 1MDB. Vendimi pritet të ketë pasoja të rëndësishme politike në vend.
Sipas hetuesve të Malajzisë dhe Shteteve të Bashkuara, të paktën 4.5 miliardë dollarë janë vjedhur nga 1Malaysia Development Berhad (1MDB), fond shtetëror i bashkëthemeluar nga Najib në vitin 2009, gjatë vitit të parë të mandatit të tij në pushtet. Më shumë se 1 miliard dollarë dyshohet se kanë përfunduar në llogari të lidhura me Najibin, 72 vjeç.
Najib Razak ishte burgosur për herë të parë në vitin 2022 për një tjetër çështje të lidhur me 1MDB dhe ka këmbëngulur vazhdimisht se është bërë fajtor padrejtësisht në atë që konsiderohet skandali më i madh financiar në historinë e Malajzisë.
Gjatë një vendimi që zgjati pesë orë, gjyqtari i Gjykatës së Lartë, Collin Lawrence Sequerah, hodhi poshtë pretendimet e Najibit se ishte mashtruar nga drejtues të tjerë të 1MDB, duke i cilësuar ato si të pabesueshme dhe “të mbështetura në fantazi të pastër”.
Vendimi mund të përshkallëzojë tensionet brenda koalicionit qeverisës të kryeministrit Anwar Ibrahim, ku bën pjesë edhe partia UMNO, mbi të cilën Najib vazhdon të ushtrojë ndikim të konsiderueshëm, edhe pse ndodhet në burg.
