Një ngjarje e rëndë ka tronditur provincën e Kozencës në jug të Italisë, ku katër persona janë gjetur të vdekur brenda një automjeti të përfshirë nga flakët në një pikë karburanti pranë bregdetit të Jonit.
Sipas autoriteteve italiane, alarmi u ngrit rreth mesditës, pasi shërbimet e emergjencës morën njoftim për një makinë që po digjej. Pas shuarjes së flakëve, zjarrfikësit zbuluan katër trupat e pajetë brenda mjetit.
Hetimet paraprake sugjerojnë se viktimat mund të jenë shtetas pakistanezë, megjithatë identifikimi i tyre ende nuk është përfunduar. Për shkak të dëmtimeve të mëdha të shkaktuara nga zjarri, ekspertët nuk kanë arritur ende të përcaktojnë nëse personat kanë humbur jetën para shpërthimit të flakëve apo kanë pësuar dëmtime të tjera.
Në vendngjarje kanë mbërritur forca të shumta policore, përfshirë hetuesit e specializuar dhe Karabinierët, të cilët po punojnë për të zbardhur rrethanat e ngjarjes.
Sipas burimeve hetimore, kushtet në të cilat është gjetur automjeti nuk përputhen me skenarin e një aksidenti të zakonshëm, çka ka shtuar dyshimet për një ngjarje kriminale. Kamerat e sigurisë të pikës së karburantit dhe të zonave përreth pritet të jenë vendimtare për zbardhjen e rastit.
Autoritetet vijojnë hetimet për të identifikuar viktimat dhe për të kuptuar nëse bëhet fjalë për një vrasje të organizuar apo për një ngjarje me rrethana të tjera ende të paqarta.
Comments are closed.