Një operacion i gjerë i zhvilluar nga Prokuroria e Posaçme Kundër Korrupsionit dhe Krimit të Organizuar (SPAK), në bashkëpunim me Policinë e Shtetit, ka çuar në ekzekutimin e disa masave të sigurisë ndaj personave të dyshuar për përfshirje në veprimtari kriminale.
Burime paraprake bëjnë me dije se në kuadër të aksionit është arrestuar biznesmeni Orest Sota, ndërsa masat e sigurisë “arrest me burg” për biznesmenët Artur Shehu dhe Ilir Shtufi nuk janë ekzekutuar, pasi ata rezultojnë jashtë territorit të Shqipërisë.
Në kërkim është shpallur edhe Edmond Jaupi.
Sipas të dhënave paraprake, personat nën hetim dyshohen për trafikim të lëndëve narkotike dhe pastrim të produkteve të veprës penale në shuma të konsiderueshme, veprimtari që dyshohet se janë kryer në kuadër të një grupi të strukturuar kriminal.
Hetimet kanë marrë shtysë edhe nga komunikimet e zbardhura në platformën e enkriptuar Sky ECC, ku sipas burimeve hetimore janë evidentuar biseda që lidhen me trafikun e drogës dhe qarkullimin e parave të pista.
Operacioni vijon ende, ndërsa pritet që SPAK dhe Policia e Shtetit të japin detaje të mëtejshme mbi personat e përfshirë, akuzat konkrete dhe rezultatet e plota të aksionit.
Detaje të reja kanë dalë nga megaoperacioni i zhvilluar nga SPAK në bashkëpunim me Policinë e Shtetit, i cili ka në fokus goditjen e një grupi të strukturuar kriminal të dyshuar për trafik ndërkombëtar të lëndëve narkotike dhe pastrim parash.
Sipas gazetares Klodiana Lala, mes personave të arrestuar është edhe Orgest Birçaj, i njohur si pronar i kompanisë së automjeteve luksoze “Top Seven”.
Burime pranë hetimit bëjnë me dije se SPAK ka nisur procedurat për sekuestrimin e automjeteve në pronësi të kompanisë, pasi dyshohet se ato lidhen me veprimtari të pastrimit të produkteve të veprës penale.
Në kuadër të këtij operacioni, Prokuroria e Posaçme ka lëshuar 20 masa sigurie, një pjesë e të cilave janë ekzekutuar, ndërsa aksioni vijon ende në disa zona të vendit.
Comments are closed.