Pas tre javësh protestash të pandërprera në kryeqytet, Presidenti i Republikës, Bajram Begaj, ka reaguar për herë të parë lidhur me zhvillimet politike në vend, duke theksuar rëndësinë e respektimit të të drejtës së qytetarëve për t’u shprehur dhe për të marrë pjesë në jetën publike.
Deklarata e tij u bë gjatë ceremonisë së 100-vjetorit të krijimit të Prefekturës së Tiranës, një aktivitet që përkoi me një moment tensioni politik dhe mobilizimi qytetar në rrugët e kryeqytetit.
Begaj u shpreh se e drejta e protestës dhe shprehjes së lirë është një vlerë e garantuar nga Kushtetuta dhe duhet të ushtrohet në përputhje me ligjin dhe rendin demokratik.
“Ky aktivitet zhvillohet në një moment kur qytetarë po shprehin publikisht shqetësimet dhe pritshmëritë e tyre në mënyrë paqësore. Në respekt të pozicionit kushtetues, neutralitetit kushtetues, mund të theksoj se e drejta për t’u shprehur dhe për të marrë pjesë në jetën publike është një vlerë e mbrojtur nga Kushtetuta, e cila duhet të ushtrohet në pajtim me Kushtetutën dhe ligjet e vendit,” deklaroi Presidenti.
Ai shtoi se konsolidimi i demokracisë dhe zhvillimi i qëndrueshëm i vendit varen nga bashkëpunimi mes qytetarëve dhe institucioneve, si dhe nga respektimi i kornizës kushtetuese dhe shtetit të së drejtës.
Comments are closed.