Do të përcillet ditën e nesërme për në banesën e fundit i riu shqiptar Roland Sala, i cili pas dy javësh në koma dha frymën e fundit pasi dallgët e detit në Kretë e morën përpara, duke i shkaktuar atij asfiksi.
Lajmin për zhvillimin e ceremonisë mortore të të riut e ka bërë me dije faqja “Këtu mblidhen Dibranët” në Facebook, të cilët bëjnë me dije se Rolandi do të përcillet për në banesën e fundit ditën e nesërme , në orën 11:00, në Çidhën të Dibrës.
“Me dhimbje të thellë në zemër, njoftojmë të afërmit, miqtë dhe dashamirësit se është ndarë nga jeta djali ynë i shtrenjtë: Roland Sala! Ceremonia e varrimit do të bëhet ditën e enjte, më datë 30.07.2026, në orën 11:00, në Çidhën, Dibër. Pritja do të organizohet te lokali Hasan Krrashi” shkruhet në postimin e ndarë në rrjet.
Siç kemi raportuar dhe ditën e djeshme, 33-vjeçari shqiptar jetonte në Angli dhe kishte shkuar në ishullin e Kretës për të pushuar pranë familjarëve.
Fatkeqësisht, gjatë kohës që po bënte plazh, u përfshi nga dallgët e detit, duke pësuar asfiksi. Ai u transportua menjëherë në Spitalin e Rethimnos, ku qëndroi për rreth dy javë nën kujdesin e mjekëve, duke luftuar për jetën. Pavarësisht përpjekjeve të tyre, dje ai mbylli sytë përgjithmonë.
Lajmi tragjik ka tronditur familjen dhe gjithë komunitetin shqiptar në qytetin e Rethimnos, në Kretë. Bashkatdhetarët atje janë organizuar për t’i dhënë lamtumirën e fundit Rolandit, në shenjë respekti, solidariteti dhe nderimi për një bir të kombit që u nda tragjikisht nga jeta.
Ndërsa nesër familjarë, miq e të afërm do t’i japin Rolandit lamtumirën e fundit.
Newsbomb.al i shpreh ngushëllime familjes Sala për humbjen tragjike të djalit të tyre.
Comments are closed.