Dy zhvillime brenda së njëjtës ditë, të dyja me epiqendër Austrinë, ngrenë një pikëpyetje të fortë rreth Mirel Mërtirit dhe aferës së inceneratorëve: a është pikërisht ai shqiptari mbi dëshminë e të cilit po ndërtohet dokumentari investigativ që paralajmëron publikimin e emrave, pagesave dhe gjurmëve të parave?
Mbrëmjen e kësaj të mërkure, në ditën e 116-të të protestës kundër qeverisë dhe kryeministrit Edi Rama, aktivisti Edison Lika deklaroi se Mirel Mërtiri është dorëzuar ose është kapur në Austri dhe foli konkretisht për “provat e inceneratorëve”.
“Sot në Austri është dorëzuar ose është kapur edhe Mirel Mirtëri megjithë provat e inceneratorëve. Dalëngadalë e ditë pas ditë e kemi gërryer pushtetin e kësaj qeverie”, deklaroi Lika.
Pretendimi nuk është konfirmuar ende zyrtarisht nga autoritetet shqiptare apo austriake. Por ai vjen vetëm disa orë pasi u publikuan fragmentet e para të një investigimi që po përgatitet pikërisht në Austri dhe që bazohet në dëshminë e një personi nga Shqipëria, identiteti i të cilit mbahet sekret.
Në qendër të dokumentarit është regjisori dhe producenti austriak Frederik Füssel. Materiali i bërë publik tregon Füssel përballë dëshmitarit shqiptar, ndërsa në duart e tij ndodhet një USB që, sipas dëshmitarit, përmban të dhëna për pagesa, emra, shuma parash dhe arsyet përse janë kryer këto pagesa.
Gazetari: Pra çfarë ka në këtë USB?
Dëshmitari: Të gjitha të dhënat, të gjitha pagesat…
Gazetari: Pra, nëpërmjet kësaj USB mund të shkosh tek të gjitha…?
Dëshmitari: Të gjithë njerëzit që unë po akuzoj sot.
Gazetari: Pra këtu ke emrat?
Dëshmitari: Ke emra, shumën e parave, ke të dhëna, ke dhe arsyet se pse janë paguar këto para tek ata…
Pikërisht këtu dy zhvillimet e së njëjtës ditë kryqëzohen: nga njëra anë, në Austri ndodhet një dëshmitar shqiptar që ka dorëzuar materiale mbi pagesa dhe persona që ai akuzon për korrupsion; nga ana tjetër, Lika deklaron se po në Austri është dorëzuar ose kapur Mirel Mërtiri dhe e lidh atë drejtpërdrejt me “provat e inceneratorëve”.
Kjo përputhje të çon natyrshëm në përfundimin se personi që ka folur për dokumentarin është vetë Mërtiri.
Ndërkohë, gjatë protestës, Edison Lika e lidhi zhvillimin me hetimet e fundit të SPAK, duke theksuar se presioni i protestave ka dhënë rezultat.
“A mendoni se do ishte Ergys Agasi po të mos ishte kjo protestë? A mendoni se drejtoresha e SHISH do i ishte në arrest shtëpia po të mos ishte kjo protestë? A mendoni se e radhës do të jetë Belinda Balluku pikërisht pas kësaj protestës?! A mendoni se bashkë me Ballukun e ka radhën edhe Edi Rama? Qëndresa jonë i ka dhënë rezultatet e veta. Sot në Austri është dorëzuar ose është kapur edhe Mirel Mirtëri megjithë provat e inceneratorëve. Dalëngadalë e ditë pas ditë e kemi gërryer pushtetin e kësaj qeverie”, tha Lika.
Tashmë mbeten dy pikëpyetje që kërkojnë konfirmim: nëse Mirel Mërtiri është vërtet dorëzuar apo ndaluar në Austri dhe nëse ai është personi që qëndron pas dëshmisë dhe materialeve mbi të cilat po ndërtohet investigimi i Frederik Füssel. Përkimi i vendit dhe momentit i lidh fort dy zhvillimet, por përgjigjja përfundimtare pritet nga konfirmimet zyrtare dhe publikimi i plotë i investigimit.
Comments are closed.