Reagon këngëtarja: Dhimbje që nuk ia uroj asnjë gruaje, turpi u takon atyre që i shpërndanë
Pas publikimit në rrjetet sociale të videove intime që kanë shkaktuar reagime të shumta publike, këngëtarja Eli Fara ka reaguar për herë të parë, duke folur për pasojat që kjo ngjarje ka sjellë për të dhe familjen e saj.
Në reagimin e saj, artistja e vendos theksin te cenimi i privatësisë dhe te mënyra se si viktimat e publikimit të materialeve intime përballen më pas me gjykimin dhe komentet e shoqërisë. Ajo thekson se nuk ndihet e turpëruar për atë që ka ndodhur, ndërsa përgjegjësinë morale ua atribuon personave që kanë publikuar dhe shpërndarë pamjet.
Eli Fara shprehet se situata i ka shkaktuar një dhimbje të thellë, veçanërisht për shkak të ndikimit që ajo ka pasur edhe te njerëzit e saj të afërt.
“Po përjetoj një dhimbje që nuk ia uroj asnjë gruaje: cenimin e privatësisë dhe përballjen me gjykime e fyerje që prekin edhe familjen time”, shkruan këngëtarja.
Artistja ngre gjithashtu një shqetësim më të gjerë mbi mënyrën se si shoqëria reagon ndaj grave kur ato përballen me raste të cenimit të privatësisë. Sipas saj, në vend që përgjegjësia të kërkohet te personat që kanë shkaktuar dëmin, shpesh vëmendja zhvendoset te vetë gruaja që është prekur nga ngjarja.
“U cenojnë privatësinë dhe pastaj u kërkojnë të japin llogari. I lëndojnë dhe pastaj i gjykojnë për mënyrën si e përballojnë dhimbjen. Asnjë grua nuk duhet të kalojë nëpër këtë poshtërim”, shprehet ajo.
Përballë publikimit dhe shpërndarjes së materialeve intime, Eli Fara bën të ditur se çështjen do t’ia lërë drejtësisë, ndërsa i drejtohet publikut me një apel për të ndalur qarkullimin e pamjeve.
Ajo kërkon që, përpara se të bëhen komente apo gjykime, të merret në konsideratë pasoja që mund të ketë shpërndarja e mëtejshme e materialeve te personi i prekur dhe familjarët e tij.
“Përpara çdo gjykimi, mendoni për njeriun dhe familjen që po lëndoni”, shkruan artistja.
Në fund të reagimit, këngëtarja falënderon familjarët, miqtë, kolegët dhe të gjithë personat që i kanë qëndruar pranë gjatë kësaj periudhe, qoftë publikisht apo në mënyrë private.
Eli Fara shprehet se mbështetja dhe mirëkuptimi i tyre i kanë dhënë forcë për të vijuar përpara, duke theksuar vendosmërinë për ta përballuar situatën me dinjitet.
Comments are closed.