Një tabelë e rreme e kufizimit të shpejtësisë ka shkaktuar një situatë të pazakontë në qytetin gjerman Haldensleben, ku 396 shoferë u fotografuan nga radari, por në fund të gjitha gjobat u anuluan.
Në fillim të shtatorit, një person ende i paidentifikuar vendosi në Magdeburger Straße një tabelë që tregonte kufizimin 70 km/h. Në të vërtetë, shpejtësia maksimale e lejuar në atë segment ishte 50 km/h.
Tabela ishte vendosur pak përpara një radari aktiv dhe dukej si sinjalistikë zyrtare. Për pasojë, shumë drejtues mjetesh besuan se mund të udhëtonin me 70 km/h.
Nga 4 deri më 6 shtator, radari regjistroi 396 raste tejkalimi të kufirit real të shpejtësisë. Numri jashtëzakonisht i lartë ngriti dyshime dhe pas një kontrolli në terren u zbulua tabela false. Autoritetet konstatuan se për montimin e saj ishin përdorur pjesë dhe vida që nuk përdoren nga shërbimet komunale.
Problemi më pas kaloi në planin ligjor. Autoritetet nuk mundën të përcaktonin saktësisht se kur ishte vendosur tabela dhe, për këtë arsye, vendosën të anulonin të 396 procedurat.
Gjobat iu hoqën edhe shoferëve që kishin udhëtuar me shpejtësi dukshëm më të lartë se 70 km/h. Ndërkohë, policia gjermane ka nisur hetimet dhe po kërkon dëshmitarë për të identifikuar personin që vendosi tabelën.
Comments are closed.