Ish-deputeti Lefter Maliqi ka deklaruar se ish-kryebashkiaku i Durrësit, Vangjush Dako, është dërguar sërish në burg për të bindur Erion Veliajn që të pranojë shkarkimin si kryebashkiak i Tiranës. Lefter Maliqi theksoi në “Off the Record” në A2 CNN se Edi Rama i ka çuar Veliajt edhe të fortë të tjerë, të cilët i kanë thënë Veliajt se do të lirohet nga qelia nëse pranon shkarkimin, por ky i fundit sërish nuk ka pranuar.
“E shkarkoi Tushen se ra dakord me shkarkimin dhe nuk bëri ankimin. Kurse Rama i çoi doktor Dakon i mati tensionin i dha dhe kokrrën e ilaçit që të pranonte shkarkimin gjë që u refuzua. Veliaj bëri mirë që ka refuzuar. Derisa gjykatat e çuan sërish Dakon 5-6 ditë në burgun e Durrësit.
I ka çuar edhe të fortë të tjerë, por nuk ka arritur të pranonte shkarkimin se nuk i besonte Ramës; Haberi ka qenë; prano shkarkimin se nesër do dalësh nga burgu, por duke ditur pabesinë, pavarësisht se nuk flet. E çoi për t’i mbushur mendjen, i mati dhe tensionin. Kishte luhatje të tensionit.”-tha Maliqi.
Ish-deputeti u shpreh se shkarkimi i Veliajt është një lojë politike e Ramës në një kohë kur opozita e ka akuzuar Veliajn për inceneratorët e 5D. Maliqi thekson se Gjykata Kushtetuese do ta pezullojë pasi nuk ka shkak ligjor për shkarkimin e tij.
“Është një lojë politike, opozita e ka akuzuar për inceneratorët e 5D. Ai u arrestua për rrobat e brendshme. Gjykata Kushtetuese do ta pezullojë se nuk ka shkak ligjor për shkarkimin e tij. Rama të gjitha këto i bën për të mbuluar skandalet e përgjimet që po i dalin nga ndërkombëtarët se pritet dhe raporti i OSBE ODIHR për masakrën elektorale”.-tha Maliqi.
Deputetja e Partisë Demokratike, Jorida Tabaku, ka komentuar zhvillimet më të fundit politike që lidhen me vakancën në krye të Bashkisë së Tiranës, pas shkarkimit të Erion Veliajt si dhe marrëdhënien e këtij të fundit me kryeministrin Edi Rama.
Tabaku e cilësoi këtë proces si një pasqyrim të kapjes së institucioneve dhe mungesës së balancave në sistemin politik, duke shprehur më tej rezervat e saj lidhur me rolin e presidentit të Shqipërisë, Bajram Begajt në këtë situatë.
“Shpresoi që Presidenti të ngrihet në lartësinë e detyrës. Unë besoj tek institucionet dhe vendimet e tyre, por në këtë rast Presidenti është i kushtëzuar nga një njoftim që Gjykata Kushtetuese ka bërë. Presidenti s’mund të dekretojë një datë për Tiranën, për shkak të ankimimit i cili e pezullon shkarkimin”, tha ajo, duke e përshkruar këtë rast si unik dhe një sfidë serioze për Begajn dhe institucionet kushtetuese në vend.
Sa i përket raportit të Ramës dhe Veliajt, Tabaku la të kuptohet se marrëdhënia mes tyre është tensionuar dhe shpresoi se ish-kryebashkiaku i Tiranës, i shkarkuar me VKM, të kthehet në “pentito” të drejtësisë.
“Fakti që Veliaj ka çuar çështjen në Kushtetuese tregon shumë. Unë shpresoj që ai të shkojë deri në fund të këtij procesi dhe të kthehet edhe në një i penduar i drejtësisë”, deklaroi Tabaku për Klan News.
Kujtojmë se mesditën e ditës së sotme, kryeministri Edi Ramadërgoi në Presidencë 6 vakancat për bashkitë që ndodhen pa kryebashkiak, përfshirë edhe Tiranën.
Pavarësisht se Kushtetuesja nuk ka dhënë “verdiktin” sa i takon ankimimit që ka bërë Erion Veliaj i cili kundërshton shkarkimin si kryebashkiak i Tiranës me pretendimin se vendimi i Këshillit Bashkiak është i paligjshëm dhe anti-kushtetues.
Në një përgjigje për “Euronews Albania”, Gjykata konfirmoi se “në përputhje me Nenit 115 të Kushtetutës, në rast ankimi, vendimmarrja pezullohet automatikisht”.
Kjo përgjigje erdhi pas pyetjes nëse Kryeministria dhe Presidenca janë njoftuar për pezullimin e vendimit të Këshillit të Ministrave mbi shkarkimin e Erion Veliajt.
“Gjykata Kushtetuese vijon të monitorojë procesin dhe do të japë vendimin përfundimtar në përputhje me legjislacionin në fuqi”, thuhej në reagimin e shkurtër të Gjykatës Kushtetuese.
Ende nuk ka asnjë informacion si do të veprojë Presidenca në rastin e Veliajt pasi nuk mund të shpallë një datë zgjedhjesh në një moment kur Kushtetuesja ende nuk ka dhënë vendimin për ankimimin e ish-kryebashkiakut tashmë të shkarkuar.
Një zgjidhje momentale e Bajram Begajt mund të jetë dekretimi i datës për 5 bashkitë e tjera, ndërsa ajo e Tiranës mund të shikohet mundësia që të lihet pezull, duke i dhënë mundësi Kushtetueses që të japë verdiktin final për Erion Veliajn.
