Gazetari peruan Fernando Nunez është vrarë nga persona të armatosur të paidentifikuar ndërsa kthehej nga një raportim në departamentin verior të La Libertad, bëri të ditur të dielën Shoqata Kombëtare e Gazetarëve të Perusë (ANP). Drejtori i portalit të lajmeve Kamila TV është gazetari i tretë që humb jetën në Peru gjatë këtij viti.
Sipas deklaratës së ANP-së, Nunez “u qëllua nga persona të armatosur teksa udhëtonte me motoçikletë së bashku me vëllain e tij” pasditen e së shtunës. Ai ndërroi jetë në vend, ndërsa vëllai i tij mbeti i plagosur rëndë dhe u dërgua në spital në gjendje kritike.
Ngjarja ka ndodhur në zonën e Guadalupe-s, në La Libertad, një prej rajoneve më të goditura nga dhuna, ku policia raporton 236 vrasje nga janari deri në tetor. ANP u bëri thirrje autoriteteve të kryejnë hetime të plota, duke marrë parasysh mundësinë që vrasja të lidhet me punën e gazetarit.
“Sulmi i radhës ndaj një gazetari tregon për një përshkallëzim të padurueshëm të dhunës ndaj atyre që ushtrojnë funksionin e informimit,” theksoi shoqata.
Krizës së sigurisë i parapriu edhe një krizë politike: në tetor, Kongresi shkarkoi ish-presidenten Dina Boluarte (2022–2025), duke e akuzuar për “paaftësi të përhershme morale” në trajtimin e situatës. Detyrën e kreut të shtetit e mori më pas kryetari i parlamentit, José Gerry, i cili do të drejtojë vendin deri në zgjedhjet e vitit 2026.
