Monika nuk e di më nëse ia vlen ende martesa me burrin e saj: Pothuajse fare marrëdhënie intime, punët e shtëpisë i bën vetëm ajo dhe, përveç premtimeve boshe, nuk vjen asgjë prej tij.
Pyetja e Monikës (25) për Doktor Sex:
Jam prej tetë vitesh me burrin tim. Prej një viti jemi të martuar. Por tashmë nuk jam më e sigurt nëse ia vlen ende kjo lidhje. Prej dy vitesh ai po përpiqet të ndërtojë një biznes të tijin. E mbështes me gjithë forcën time. Por në shtëpi nuk merr asnjë iniciativë. Gjithmonë duhet t’i them se çfarë duhet bërë, por edhe atëherë nuk bëhet asgjë. Përbrenda dy vitesh dua të kem një familje, por nuk e kuptoj si do të mund të ndodhë kjo në këto kushte.
Sa i përket seksit, nuk ka shumë për të thënë. Ai ndodh vetëm gjatë fundjavës dhe si një “quickie” në mëngjes – edhe pse i them që dua diçka ndryshe nga ky seks dy-minutësh. Në mbrëmje – unë punoj deri në gjashtë e gjysmë – ai është shumë i lodhur. Gjithnjë e më shumë kam ndjesinë se jam thjesht një kolege ose nëna e tij, por jo më bashkëshortja. Asnjëherë nuk më thotë që dukem mirë. Edhe kur blej diçka të bukur enkas për të dhe ia tregoj, nuk reagon. Unë në fakt ende ndjej entuziazëm për të. Por nervat më kanë lënë krejtësisht. Kur flas me të për problemet që kam, ai më thotë se më kupton dhe se kam të drejtë. Por nuk ndryshon asgjë! Çfarë duhet të bëj?
Përgjigjja e Doktor Sex
E dashur Monika,
Të përjetosh një marrëdhënie si sfidë apo të kesh vështirësi të caktuara në të, për shumë njerëz ende shihet si një dështim. Shpesh mendohet se një martesë apo lidhje është “e mirë” vetëm atëherë kur shkon në mënyrë harmonike, pa qoshe të mprehta e pa tensione. Për këtë arsye, shumica e çifteve presin shumë gjatë para se të kërkojnë ndihmën e një terapisti për çifte – për të nisur të shqyrtojnë më thellë dhe të ndryshojnë mënyrën e komunikimit dhe sjelljet në marrëdhënie. Më mirë përpiqen ta rregullojnë vetë, dhe rezultati është që spirala e problemeve vetëm sa përshpejtohet. Vetëm pak para se gjithçka të shembet dhe të përmendet ndarja si opsion, lind ideja se ndoshta duhej provuar me terapi.
Historia jote ngjan me shumë të tjera që dëgjoj shpesh në praktikën time. Varësisht nga tema dhe dinamika e çiftit, rolet janë ndarë ndryshe, por shpesh ndodh që njëri ankohet dhe mbulon tjetrin me kritika, ndërsa tjetri mbrohet – ose, nëse situata është bërë shumë e tensionuar, shmang përballjen duke heshtur.
Që partneri yt të pajtohet me ty kur i shpjegon problemet që ke me të dhe me marrëdhënien, por të mos ndryshojë sjellje, për mua nuk tregon mungesë vullneti, por më shumë një ndjenjë pafuqie. Ka shumë gjasë, sipas mendimit tim, që ai dëgjon shpesh nga ty se çfarë nuk shkon dhe cilat sjellje të tij të shqetësojnë. Por, ndoshta, rrallë ose aspak dëgjon se çfarë të pëlqen ende tek ai apo tek lidhja juaj. Këtu mund të fillosh: fol më shpesh për gjërat që të gëzojnë dhe të pëlqejnë. Sipas studimeve, raporti duhet të jetë rreth katër me një – katër deklarata pozitive për çdo një negative.
Gjithashtu, të rekomandoj metodën e quajtur “VW-intervenim”: në vend të kritikave, shprehu me dëshira. Dhe për në fund, por jo më pak e rëndësishme: regjistrohuni për terapi në çift!/20minuten
