Partia Demokratike ka ngritur alarmin se në Lezhë, drejtorët e Bashkisë dhe të disa institucioneve të tjera dhe disa zyrtarë të Partisë Socialiste po blejnë masivisht vota.
Kandidati i PD për këtë qark, ish -gjyqtari Gjin Gjoni, ka publikuar një listë me zyrtarët që sipas tij janë përfshirë jo vetëm në fenomenin e blerjes së votave, por edhe në indimidimin e zgjedhësve.
“Njerëz nga vetë Partia Socialiste me informojnë se këta janë disa prej emrave që janë pjesë e përpjekjeve për blerje votash dhe intimidim të qytetareve”, -shkruan Gjoni duke publikuar listën.
Foto
• Denis Pervathi – Drejtor i Tatimeve në Bashkinë Lezhë po vepron në Kolsh
• Eraldo Smaçi – Drejtor i IVMT në Bashkinë Lezhë po vepron në Zejmen
• Paulin Gjergji – Drejtor i Emergjencave në Bashkinë Lezhë po vepron në Balldre
• Rigels Nicaj – Zyrtar i Partisë Socialiste po vepron në Ishull-Lezhë
• Fred Pervathi – Shofer ambulance po vepron në Manati
• Agim Prendi – Zyrtar i PS po vepron në Zejmen
• Emirjan Lazri – Drejtor i Inspektoriatit Shëndetësor po vepron në Dajç
Kandidati për deputet i PD i bën thirrje SPAK-ut të veprojë, duke paralajmëruar se në të kundërt mund të ketë përplasje mes dy kampeve.
“Me afrimin e datës së zgjedhjeve, po shfaqen gjithnjë e më hapur elementë që po përpiqen të deformojnë vullnetin e qytetarëve përmes blerjes së votës. I bëj thirrje publike SPAK dhe organeve të drejtësisë të veprojnë menjëherë ndaj këtyre personave, për të shmangur përplasjet dhe tensionet që mund të lindin. Ne nuk do të lejojmë që demokracia të nëpërkëmbet – kushdo që do tentojë të prekë votën e lirë do të na ketë përballë!” – shprehet ai në deklaratën e tij.
Gjoni thotë se “këta individë dhe të tjerë që do t’i denoncojmë me zë dhe figure më ditet në vijim duhet të hetohen pa vonesë dhe të vihen para drejtësisë, pasi ne jemi të vendosur që vullneti i qytetareve të mos tjetersohet siç ka ndodhur në zgjedhjet e shkuara.”
Partia Demokratike ka deklaruar vazhdimisht se edhe në zona të tjera ka tentativa për blerjen e votave, nga zyrtarë të administratës publike, të Partisë Socialiste apo nga individë të tjerë. SPAK ka hapur zyra në 12 qarqet e vendit pikërisht për ta luftuar këtë fenomen. Deri tani, SPAK po ndjek 26 çështje për blerje të votës, intimidimin e votuesve apo përdorimin e administratës dhe të burimeve shtetërore për të tjetërsuar votën. /Zoom.al
