Nello Trocchian ka investiguar klanet romake, veçanërisht klanin Casamonica, mafian shqiptare, infiltrimin e mafias në komunat italiane dhe periudhën e gjatë të të arratisurit Matteo Messina Denaro.
Ministria italiane e Brendshme ka vendosur mbrojtje policore gjatë ditës për gazetarin investigativ Nello Trocchia, pas shumë kërcënimeve të lidhura me punën e tij mbi krimin e organizuar, trafikun ndërkombëtar të drogës dhe lidhjet mes mafias dhe politikës.
Vendimi u mor pas vlerësimeve të autoriteteve të sigurisë dhe sinjalizimeve të mbërritura në Drejtorinë Antimafia të Distriktit të Romës, e cila ka ndjekur rastin për shkak të natyrës së kërcënimeve dhe personave të përfshirë.
Trocchia, gazetar nga Napoli dhe autor i disa hetimeve mbi mafian italiane dhe grupet kriminale shqiptare, është rikthyer së fundmi në qendër të vëmendjes pas publikimit të disa pjesëve nga libri i tij “Invincibili. La mafia albanese da Roma alla conquista del mondo”, ku trajtohen rrjetet e trafikut të drogës dhe raportet mes krimit të organizuar dhe politikës.
Në intervista të dhëna për mediat shqiptare dhe italiane, Trocchia ka folur edhe për një takim të zhvilluar në Aruba në vitin 2019, që sipas dokumenteve të cituara në hetimet antimafia, dyshohet se ka përfshirë eksponentë të grupeve kriminale shqiptare dhe persona të lidhur me qeverinë shqiptare.
Sipas gazetarit, në përgjimet dhe dokumentet hetimore përmenden “figura të nivelit të lartë” të qeverisë së Edi Ramës, ndërsa ai ka deklaruar se Drejtoria Antimafia ka konfirmuar ekzistencën e një takimi në Karaibe “mes Shehut dhe bashkëpunëtorëve të tij me figura të pacaktuara të qeverisë në detyrë”.
“Ka biseda të përgjuara ku flitet për njerëz të nivelit të lartë të qeverisë së Edi Ramës”, deklaroi Trocchia në një intervistë, duke shtuar se mbetet detyrë e institucioneve të sqarojnë identitetin dhe rolin e personave të përfshirë.
Gazetari italian ka trajtuar në mënyrë të vazhdueshme edhe çështjen e korrupsionit dhe ndikimit të mafias shqiptare në ekonominë dhe politikën e vendit. Në librin e tij ai përfshin intervista me ish-magjistratë italianë dhe hetues antimafia, të cilët flasin për lidhjet mes korrupsionit, institucioneve dhe fuqisë së organizatave kriminale në Shqipëri.
Sipas mediave italiane, ndër episodet që kanë shtyrë autoritetet të marrin masa mbrojtëse ndaj Trocchia-s janë kërcënime të ardhura nga persona të lidhur me qarqe kriminale dhe grupe ultrasish. Një nga emrat e përmendur është Walter Domizi, i njohur në botën kriminale romake me nofkën “Gattino”, i dënuar më parë për trafik droge dhe i përfshirë në hetime mbi trafikun ndërkombëtar të narkotikëve.
Në dosje përmendet edhe Antonio Prestia, i konsideruar nga hetuesit si person i afërt me klanin Guarnera dhe që dyshohet se ka ushtruar presion ndaj gazetarit për shkak të punës së tij investigative.
Rasti ka rikthyer në vëmendje çështjen e sigurisë së gazetarëve investigativë në Itali, veçanërisht të atyre që raportojnë mbi mafian dhe rrjetet e trafikut ndërkombëtar të drogës.
Pas vendimit të Ministrisë së Brendshme italiane, Nello Trocchia falënderoi institucionet për mbështetjen dhe deklaroi se do të vazhdojë punën e tij.
“Institucionet kanë vendosur të rrisin nivelin e mbrojtjes për mua duke caktuar një truproje. Falënderoj ata që janë përgjegjës për sigurinë time”, komentoi Trocchia në Il Domani, duke shtuar: “Thjesht ndiej një ndjenjë të ripërtërirë përgjegjësie që duhet të shoqërojë profesionin tim. Do të vazhdoj të tregoj histori dhe territore të plaçkitura nga fuqitë kriminale, një qytet, kryeqyteti i vendit tonë, i cili është bërë një qendër për trafikun e drogës. Falënderoj gazetën time, njerëzit që mbështesin punën time, të dashurit e mi, kolegët që kanë shprehur mbështetjen e tyre.”
Comments are closed.