Hasan Ferracaku, një prej personave kyç të përfshirë në ngjarjen e përgjakshme të Velipojës në vitin 2021, ka thyer masën e sigurisë dhe është arratisur nga banesa e tij në lagjen “Guerrile” të Shkodrës. Edhe pse ndodhej nën mbikëqyrje policore 24-orëshe prej afro 3 vitesh (pas përfundimit të afateve të paraburgimit), Ferracaku ka gjetur mënyrën t’i shpëtojë patrullës operative mëngjesin e sotëm.
Njoftimi zyrtar i Policisë
Sipas bluve të Shkodrës, rreth orës 05:30 të mëngjesit, shërbimet e Njësisë së Sigurisë Publike konstatuan mungesën e të hetuarit për “Vrasje me dashje” në banesën e tij.
“Menjëherë pas konstatimit, shërbimet e Policisë, në bashkëpunim me Njësinë e Sigurisë Publike Shkodër, kanë organizuar kontrolle në banesa dhe në ambiente të tjera, në të cilat dyshohet se mund të jetë fshehur ky shtetas. Grupi hetimor dhe Agjencia e Mbikëqyrjes Policore (AMP) vijojnë punën për dokumentimin e plotë të rastit,” bën me dije policia.
Kronika e masakrës së Velipojës (Qershor 2021)
Ngjarja e rëndë erdhi pas një konflikti të ashpër mes familjeve Ferracaku dhe Gocaj për ndarjen dhe vendosjen e parcelave të shezlongëve përpara hoteleve të tyre në plazhin e Velipojës. Sherri verbal degradoi në përdorimin e armëve të zjarrit në ambientet e hotelit të familjes Gocaj, ku palët ishin ulur për t’u sqaruar.
Nga përplasja e armatosur mbetën të vrarë katër persona:
Kujtim Ferracaku (59 vjeç)
Edmond Gocaj (38 vjeç)
Xhovani Gocaj (25 vjeç)
Myzerim Zeneli (20 vjeç, kamarier i hotelit, i cili kishte ditën e parë të punës)
Në atë kohë, Hasan Ferracaku dhe nipi i tij 17-vjeçar mbetën të plagosur dhe u arrestuan në spital. Sipas dosjes së prokurorisë, në vendngjarje u përdorën të paktën 4 armë zjarri (një kallashnikov nga Xhovani Gocaj dhe tre pistoleta nga pjesëtarët e familjes Ferracaku). Për këtë masakër, policia vijon të ketë në kërkim edhe tre djemtë e Hasan Ferracakut: Abedin, Shyqyri dhe Besmir Ferracaku.
Comments are closed.