Jason Arday, akademiku që dha dorëheqjen javën e kaluar si profesor në Universitetin e Kembrixhit, është gjetur i vdekur në shtëpinë e tij në jug të Londrës. Policia Metropolitane tha se oficerët u thirrën në adresën e Arday nga shërbimi i ambulancës së Londrës pas orës 3 të pasdites të premten.
“Një burrë 41-vjeçar u shpall i vdekur në vendngjarje. Të afërmit e tij janë informuar dhe po mbështeten nga oficerët Për momentin, vdekja e tij po trajtohet si e papritur, por nuk besohet të jetë e dyshimtë. Rasti po hetohet nga oficerë të njësisë qendrore jugore të komandës së Metropolit. Një dosje do të përgatitet për mjekun ligjor.”, tha një zyrtar policor.
Arday u emërua profesor i sociologjisë së arsimit në Kembrixh në vitin 2023 dhe ishte profesori më i ri me ngjyrë i universitetit. Por ai dha dorëheqjen javën e kaluar pas akuzave për plagjiaturë dhe mospërputhje në deklaratat rreth karrierës dhe arritjeve të tij .
Në një deklaratë ku njoftonte dorëheqjen e tij, Arday tha: “Me trishtim të thellë po shkruaj për të dhënë dorëheqjen, me efekt të menjëhershëm, nga pozicioni im në Universitetin e Kembrixhit dhe në Kolegjin Jesus.”
“Kur pranova nderin e jashtëzakonshëm për t’u bërë profesor i sociologjisë në Kembrixh, ishte, pa dyshim, privilegji më i madh profesional i jetës sime.”
Arday tha se ishte detyruar të jepte dorëheqjen sepse “akuzat, spekulimet dhe komentet publike të pamëshirshme kanë lënë një gjurmë të thellë tek unë dhe tek ata që dua”.
Autobiografia e Arday u botua këtë javë në SHBA nga një shtëpi botuese e Simon & Schuster. Kompania kishte thënë se planifikonte të vazhdonte me botimin në Mbretërinë e Bashkuar më vonë këtë muaj.
Comments are closed.