Pamje të rënda kanë dalë nga aksidenti tragjik i regjistruar pak pas mesnate në Manzë të Durrësit, ku tre të rinj humbën jetën dhe dy të tjerë mbetën të plagosur.
Sipas të dhënave paraprake automjeti tip BMW me të cilin po udhëtonin pesë të rinjtë, ka dalë nga rruga pasi dyshohet se shoferi 25-vjeçar ka humbur kontrollin mbi mjetin. Si rrjedhojë makina ka përfunduar në një kanal dhe më pas është përplasur me një strukturë betoni në anë të rrugës.
Pamjet e siguruara nga vendngjarja tregojnë qartë forcën e përplasjes. BMW-ja është dëmtuar thuajse tërësisht, duke u bërë copash nga goditja. Nga dinamika e aksidentit dhe gjurmët në vendngjarje, dyshohet paraprakisht se automjeti mund të ketë qenë duke lëvizur me shpejtësi të lartë, por kjo mbetet për t’u përcaktuar nga grupi hetimor.
Përplasja ka rezultuar fatale për drejtuesin e automjetit, K. V., 25 vjeç si dhe për pasagjerët S. B., 26 vjeçe dhe A. M., vetëm 15 vjeç. Tre të rinjtë nuk kanë mundur t’u mbijetojnë plagëve të marra.
Ndërkohë dy pasagjerët e tjerë, R. V., 25 vjeç dhe K. D., 16 vjeç, kanë mbetur të plagosur. Ata janë transportuar drejt Tiranës për të marrë ndihmë të specializuar mjekësore, ndërsa gjendja e 16-vjeçarit raportohet e rëndë.
Menjëherë pas aksidentit, në vendngjarje kanë mbërritur shërbimet e emergjencës dhe zjarrfikësit, të cilët kanë ndërhyrë për nxjerrjen e personave të bllokuar në automjet dhe për t’u dhënë ndihmën e parë të plagosurve.
Tashmë grupi hetimor po punon për të rindërtuar dinamikën e plotë të aksidentit. Ekspertiza pritet të përcaktojë shpejtësinë me të cilën lëvizte automjeti, momentin kur drejtuesi humbi kontrollin dhe rrethanat e sakta që çuan në përplasjen fatale.
Janë identifikuar tre personat që humbën jetën dhe dy të rinjtë që mbetën të plagosur në aksidentin tragjik të ndodhur gjatë natës në Manzë të Durrësit.
Viktimat janë Kleo Vrioni, 25 vjeç, drejtuesi i automjetit, Sara Brugentelli, 26 vjeçe, dhe Alvi Muhaxhiri, 15 vjeç.
Ndërkohë, të plagosur kanë mbetur Rejsi Vrijoni, 25 vjeç, dhe Klevis Dervishi, 16 vjeç. Ky i fundit ndodhet në gjendje të rëndë shëndetësore dhe është transportuar drejt Tiranës për të marrë ndihmë mjekësore.
Aksidenti ndodhi rreth orës 02:22, në një rrugë dytësore në Manzë. Sipas informacionit paraprak të Policisë, automjeti tip BMË, me të cilin udhëtonin pesë personat, ka humbur kontrollin dhe është përplasur me një bordurë betoni.
Përplasja ka rezultuar fatale për tre prej personave që ndodheshin në automjet. Pas aksidentit, makina ka përfunduar në një kanal pranë rrugës.
Në vendngjarje mbërritën shërbimet e emergjencës dhe zjarrfikësit, të cilët ndërhynë për nxjerrjen e personave nga automjeti. Dy të plagosurit u transportuan për ndihmë mjekësore, ndërsa trupat e tre viktimave u dërguan në morg.
Pamjet nga vendngjarja tregojnë dëmet e rënda të pësuara nga automjeti, i cili është shkatërruar thuajse plotësisht nga përplasja.
Grupi hetimor ndodhet në vendngjarje dhe po punon për dokumentimin e plotë të rrethanave të aksidentit dhe përcaktimin e shkaqeve që çuan në humbjen e kontrollit të automjetit.
Top Channel
Comments are closed.