Erjon Vishkulli, një nga tifozët më të njohur të Kombëtares Shqiptare të Futbollit, po përballet me një sfidë të re dhe kritike për shëndetin e tij, pas lëndimit të rëndë që pësoi në sy gjatë përplasjeve në protestat studentore. Pasi i u nënshtrua një ndërhyrjeje të ndërlikuar kirurgjikale në një spital të specializuar në Itali, ai tashmë ndodhet në një fazë vendimtare të rikuperimit për të shpëtuar shikimin.
Ngjarja e rëndë, e cila ka nxitur reagime të shumta në opinionin publik, ndodhi gjatë tubimeve protestuese ku studentët dhe qytetarët kërkonin largimin e kryeministrit Edi Rama. Vishkulli, i njohur gjerësisht mes tifozëve kuqezi për praninë dhe mbështetjen e tij të pashtershme në shkallët e stadiumeve ku luan Shqipëria, u kthye në një simbol solidariteti menjëherë pas përhapjes së lajmit për dëmtimin e tij.
Nëpërmjet një reagimi mjaft prekës të shpërndarë në rrjetet sociale, Vishkulli u është drejtuar mijëra qytetarëve që i kanë qëndruar pranë gjatë këtij udhëtimi të vështirë spitalor. Ai ka shprehur mirënjohjen e tij më të thellë për të gjithë bashkatdhetarët brenda dhe jashtë kufijve që e kanë mbështetur me mesazhe, telefonata dhe lutje.
“Në këto momente të vështira të jetës sime, ku pas një dhimbjeje të madhe po përballem edhe me një sfidë tjetër të rëndësishme për shikimin e syrit, dua të shpreh mirënjohjen time më të sinqertë për të gjithë,” shkruan ai, duke theksuar se çdo fjalë e ngrohtë i ka dhënë shpresë dhe kurajë për të ecur përpara.
Më tej, ai vuri në dukje se në çaste të tilla provash, dashuria dhe respekti i dhuruar nga njerëzit treguan se zemra shqiptare është gjithmonë e bashkuar. Përveç falënderimeve për familjarët, miqtë dhe shokët, Vishkulli shprehu besimin e tij të plotë tek Zoti për forcën dhe jetën e dhuruar çdo ditë, duke e përmbyllur mesazhin e tij me lutjen për shëndet dhe urimin simbolik: “U shtofshin Shqiptarët e mirë”. Reagimi i tij ka marrë mbështetje të madhe nga publiku dhe komuniteti i sportit.
Comments are closed.