Flavio Briatore ka dhënë një pasqyrë të gjendjes së Majkëll Shumaker, 12 vite pas aksidentit të rëndë, teksa bënte ski dhe i ndryshoi jetën. 75-vjeçari ka ndarë kujtime emocionale dhe vlerësime për legjendën e Formula 1.
Briatore drejtoi Benetonin kur Shumaker fitoi dy titujt e tij të parë radhazi.
75-vjeçari nga Italia ishte i afërt me Shumin, i cili nuk është shfaqur në publik që nga aksidenti i tij në vitin 2013, e për të cilin kujdeset një ekip mjekësor dhe bashkëshortja e tij, Korina, në shtëpinë e tyre në Liqenin e Gjenevës.
Në një intervistë për “Corriere della Sera”, Briatore tha se vazhdon që të flasë me familjen e pilotit dhe pranoi se “54-vjeçari është ende i detyruar që të qendrojë në shtrat”.
“Nëse i mbyll sytë, e shoh duke buzëqeshur pas një fitoreje. Preferoj ta kujtoj kështu”, u shpreh Briatore.
Deklarata e 75-vjeçarit përforcon atë që është pohuar më parë nga burime pranë familjes. Ish-bashkëshortja e Briatores, Elisabeta Gregoraçi, ka thënë më herët se Shumakeri “nuk flet, por komunikon me sy”.
Ndërsa djali i tij, Mik Shumaker, ka pranuar në një dokumentar të “Netflix” se komunikimi mes tyre ka ndryshuar pas aksidentit.
“Mendoj se unë dhe babi do ta kuptojmë njëri-tjetrin në një mënyrë tjetër tani”, tha 26-vjeçari në vitin 2021.
Pavarësisht sfidave, familja e Shumakerit ka dhënë shenja të vogla jete publike. Në muajin prill, 7 herë kampioni i botës në Formula 1 nënshkroi një përkrenare të ikonës së F1 Sër Xheki Stjuart, për një nismë bamirësie – një veprim që u përshkrua si “emocional” nga ish-shoku i skuadrës, Xhoni Herbert.
Majkëll Shumaker mbetet një nga pilotët më të mëdhenj në historinë e Formula 1, me 7 tituj botërorë, 155 podiume dhe 71 xhiro më të shpejta gjatë një karriere brilante.
Kur u pyet për pilotin më të mirë të të gjitha kohërave, Briatore përmendi emra të mëdhenj si Shumaker, Sena dhe Alonso, por theksoi se sot “numri një është padyshim Maks Vershtapen”.
Comments are closed.