TIRANË – Një tërmet i ri politik dhe penal duket se po afrohet në horizontin e mazhorancës socialiste, dhe këtë herë epiqendra është e vendosur në një pikë shumë të ndjeshme: mes godinës së Bashkisë së Tiranës dhe zyrës së njërit prej bashkëpunëtorëve më të afërt të kryeministrit Edi Rama. Burime të sigurta konfirmojnë se SPAK ka futur nën hetim Arbjan Maznikun, aktualisht Ministër i Shtetit për Pushtetin Vendor dhe për shumë vite krahu i djathtë i Erion Veliajt, ish-zv.kryetar i Bashkisë së Tiranës.
Mazniku, dikur figurë kyçe në menaxhimin e fondeve publike dhe mik i ngushtë i “Lali Erit”, tani përflitet si njeriu që po e fundos të gjithë kupolën politike të Tiranës – një “Nesti Angoni modern”, që nga brenda mund të ketë çuar në rrëzimin e sistemit që ndihmoi të ndërtonte. Nuk është e rastësishme që vetë Veliaj, përmes disa videove enigmatike në TikTok gjatë ditëve të fundit, ka lëshuar paralajmërime të forta për një arrest të afërt të një ministri të rëndësishëm të kabinetit Rama – pa e përmendur emrin, por duke lënë të nënkuptohet se goditja po vinte nga brenda.
Hetimet ndaj Maznikut – një skemë e ngjashme me rastin Beqaj
Sipas raportimit të gazetarit Elton Qyno në OraNews, hetimet ndaj Maznikut kanë nisur me një kontroll të befasishëm në banesën e tij 3 muaj para zgjedhjeve parlamentare, ku dyshohet se janë sekuestruar materiale komprometuese në lidhje me një seri tenderash fiktivë dhe abuzime me detyrën. SPAK po pret gjithashtu një dosje të re nga Prokuroria e Tiranës, e cila pritet të bashkohet me hetimet kryesore për të forcuar akuzat ndaj Maznikut.
Ndërkohë, nën hetim është edhe një rast i qartë konflikti interesi, ku mazniku është përfshirë në procedura prokurimi në favor të restorantit “The Home”, një biznes bashkëpronësi e bashkëshortes së tij, Marinela Lika. Ky restorant ka përfituar tendera në vlerë prej rreth 800 mijë euro përmes kompanisë publike “Tirana DC” dhe vetë Bashkisë së Tiranës gjatë viteve 2021–2022, një periudhë kur Mazniku ishte nënkryetar i bashkisë dhe Kryetar i Këshillit Administrativ të Tirana DC.
Sipas dyshimeve të SPAK, Mazniku ka lejuar dhe koordinuar lëvrimin e fondeve në favor të një kompanie që menaxhohej nga gruaja e tij, një skemë e cila ngjan frikshëm me atë të Ilir Beqajt dhe restorantit “Gzona”, i përfshirë gjithashtu në hetime për korrupsion të nivelit të lartë.
Detaj tjetër tronditës – borxhet ndaj Tatimeve
Për më tepër, restoranti “The Home” aktualisht është vendosur nën masë sigurimi nga Drejtoria Rajonale Tatimore Qendrore, për mosshlyerje detyrimesh tatimore në vlerën e 27 milion lekëve të vjetra. Kjo e ngre më tej nivelin e dyshimeve ndaj këtij rrjeti të përfitimeve, ku përfituesi kryesor del të jetë vetë familja e Maznikut.
Lali Eri nën trysni – goditje e drejtpërdrejtë ndaj Ramës?
Për shumëkënd brenda Partisë Socialiste, hetimi ndaj Maznikut shihet si një “goditje anësore, por me objektiv final kryebashkiakun Veliaj”, i cili prej kohësh është përfolur si rival i heshtur i Edi Ramës në garën për pasardhësin politik.
A është ky rasti ku miku i ngushtë e tradhtoi mikun e vjetër? A mos është Mazniku “hallka e dobët” që SPAK do të përdorë për të çmontuar sistemin e menaxhimit të fondeve publike në Bashkinë e Tiranës?
Nëse do të ndodhte një arrestim i tij, do të ishte tronditja më e madhe në kampin qeveritar pas rasteve Beqaj dhe Ahmetaj, dhe një goditje serioze për imazhin dhe balancat e brendshme të Rilindjes.
Në politikë nuk ka miqësi të përjetshme – ka interesa dhe dosje që flasin më shumë se fjalët. E në këtë lojë, Arbjan Mazniku mund të jetë çelësi që SPAK po përdor për të hapur kasafortën e Tiranës.
Tani mbetet vetëm një pyetje: a do të flasë më fort Veliaj për të mbrojtur veten, apo do të heshtë si Rama për të mbrojtur sistemin?
