Pas lajmit për arrestimin e Noizyt nga autoritetet zvicerane, ka reaguar i ashtuquajturi person i dhunuar në rastin e verës së kaluar në një diskotekë në Kosovë, Medi Iseni.
Ai ka shpërndarë një postim të Stresit, ku ky i fundit ironizon me situatën dhe duket se tallet me paraqitjen e Mediut pas incidentit, duke shkruar “Medi kopjon Vali Corleonen, ben tatuazh te syri”, në një krahasim qartazi thumbues dhe jo serioz.
Por reagimi i Medi Isenit ka qenë i ashpër. Ai i drejtohet Stresit me tone të forta, duke e quajtur “i pabesë” dhe duke përmendur incidentin e verës së kaluar si një sulm të organizuar. Ai shprehet se “prita ka vra më burra se unë”, një referencë e qartë për rrahjen që ka ndodhur në diskotekë dhe për të cilën pretendon se ishte i papërgatitur dhe i tradhtuar nga njerëz që nuk e thirrën në besë.
“Zoti osht i madh, vanon po nuk harron”, shkruan ai në postim, duke paralajmëruar se drejtësia do të vijë, sado që të vonojë.
Ai thotë se informacionet që janë fshirë nga rrjetet sociale e dëshmojnë se krimi ishte i organizuar dhe i planifikuar nga persona në Zvicër, duke aluduar për përfshirje të më shumë se një personi në incident.
Përplasja mes palëve është rikthyer publikisht në rrjetet sociale, ndërsa autoritetet zvicerane vijojnë hetimet për incidentin që çoi në arrestimin e Noizyt, një vit pas ngjarjes. /Prive By Liberta Spahiu.
Reperi i njohur shqiptar Noizy (Rigels Rajku) është ndaluar nga autoritetet zvicerane në aeroportin e Zyrihut, në një zhvillim të papritur që ka tronditur fansat dhe skenën muzikore shqiptare. Ai ndodhej në Zvicër për të zhvilluar një koncert në një nga klubet më të njohura të natës në Zurich, por ngjarja u anulua në mënyrë të menjëhershme, ndërsa organizatorët fshinë të gjitha njoftimet në rrjetet sociale, duke i shtuar dyshimet se ndalimi i tij nuk ishte i rastësishëm.
Sipas raportimeve nga mediat zvicerane, ndalimi është kryer me urdhër të Zyrës së Prokurorit Publik për Krime të Rënda dhe të Dhunshme, por akuza zyrtare nuk është bërë ende publike. Megjithatë, reagimi i menjëhershëm i mikut dhe kolegut të tij, Arkimed Lushaj (Stresi), ka hedhur dritë mbi arsyet e mundshme të këtij arrestimi.
Çfarë ndodhi vërtet? Stresi zbulon prapaskenat
Në një postim në Instagram, Stresi ka reaguar ashpër pas arrestimit të Noizyt, duke zbuluar se kjo histori lidhet me një incident të ndodhur verën e kaluar në një diskotekë, ku të dy reperët ishin të pranishëm. Sipas tij, konflikti ka ndodhur mes Noizyt dhe një shtetasi zviceran me emrin Medi Iseni, dhe përplasja ka përfunduar me dhunë fizike.
Stresi ka publikuar madje edhe fotografi të Mediut të dhunuar, duke theksuar se që nga ajo natë, nuk ka udhëtuar më në Zvicër nga frika se mos kishte ndonjë kallëzim penal ndaj tij. Ai lë të kuptohet se kallëzimi i bërë nga Iseni në Zvicër ka pasur pasoja ligjore të drejtpërdrejta për Noizyn, i cili në momentin që hyri në territorin zviceran, është ndaluar për llogari të kësaj çështjeje.
Një dosje me precedentë: Kujtojmë incidentin në Pejë
Kjo nuk është hera e parë që Noizy përfshihet në përplasje të tilla. Në gusht të vitit 2024, ai u arrestua në Shqipëri pas një kërkese për ekstradim nga Policia e Kosovës, për shkak të përfshirjes në një sherr të dhunshëm në një diskotekë në Pejë. Edhe në atë ngjarje ishte i përfshirë Stresi. Pas disa ditësh paraburgimi, Noizy u la i lirë me garanci pasurore, ndërsa në nëntor të po atij viti, ai u dënua me një gjobë prej 15 mijë eurosh nga gjykata në Kosovë. Stresi u penalizua gjithashtu me një gjobë administrative.
Medi Iseni, emër i njohur për ndjekësit e rrjeteve sociale
Për ata që ndjekin zhvillimet e skenës shqiptare në diasporë, Medi Iseni është një TikToker dhe figurë e njohur në Zvicër, i cili është përfshirë më herët në debate dhe përplasje verbale me figura të estradës shqiptare. Konflikti i tij me Noizyn dhe më pas edhe me Stresin është dokumentuar përmes videove, statuseve dhe reagimeve në rrjet.
Koncerti që nuk u mbajt dhe pasojat e mëtejshme
Klubi që kishte organizuar koncertin e Noizyt në Zurich nuk ka dhënë asnjë sqarim zyrtar, por fshirja e çdo postimi për koncertin tregon qartë se ndalimi i tij ka qenë i parashikuar ose i njohur për organizatorët. Aktualisht, reperi ndodhet në paraburgim në Zvicër, ndërsa avokatët e tij pritet të paraqesin kërkesë për lirimin e tij me kusht, në varësi të natyrës së akuzës që do të formalizohet nga prokuroria.
Kjo situatë ka ngritur pikëpyetje të shumta për të ardhmen e Noizyt, si në aspektin ligjor ashtu edhe atë artistik, pasi një dënim në Zvicër mund të kufizojë seriozisht aktivitetet e tij ndërkombëtare dhe udhëtimet për koncerte.
Ndërkohë, Stresi ka paralajmëruar se kjo është vetëm “fillimi i të vërtetës” dhe se do të zbulojë më shumë detaje në ditët në vijim. Me këtë përplasje që tashmë ka kapërcyer kufijtë e thashethemeve dhe po trajtohet seriozisht nga drejtësia, skena e hip-hopit shqiptar duket se ka hyrë në një kapitull të ri – ku ligji nuk fal, dhe fama nuk të mbron.
