Një ngjarje e rëndë dhe e pazakontë ka ndodhur mëngjesin e së martës në aeroportin Orio al Serio në Bergamo, Itali, ku një burrë rreth 35 vjeç ka humbur jetën në mënyrë tragjike, pasi është përplasur me motorin e një avioni në lëvizje. Ngjarja tronditëse ndodhi rreth orës 10:20 të mëngjesit, duke shkaktuar pezullimin e menjëhershëm të trafikut ajror për rreth 90 minuta, me pasoja të ndjeshme në itineraret ajrore.
Sipas raportimeve të para nga mediat italiane, burri nuk ishte as pasagjer dhe as punonjës i aeroportit, por kishte hyrë në mënyrë të paligjshme në zonën e brendshme të aeroportit, duke përdorur një derë sigurie në zonën e dorëzimit të bagazheve – pjesë kjo që ishte zgjeruar së fundmi dhe ku dyshohet se mund të ketë pasur mangësi në masat e kontrollit.
Pasi është zbuluar nga forcat e sigurisë, burri është ndjekur nga një punonjës i aeroportit dhe një agjent i policisë së kufirit, por ka arritur të depërtojë deri në pistë. Fatkeqësisht, në atë moment, një avion Airbus A319 i kompanisë Volotea, që po kryente manovrën e “pushback” – faza e tërheqjes së avionit nga terminali për t’u përgatitur për ngritje – ka qenë në lëvizje, dhe personi është përplasur me një nga motorët, duke ndërruar jetë në vend.
Fluturimet anullohen, trafiku ajror bllokohet
Si pasojë e incidentit, autoritetet aeroportuale pezulluan menjëherë të gjitha operacionet ajrore.
8 fluturime në nisje u anulluan,
6 fluturime në mbërritje u devijuan në aeroportet e Veronës dhe Malpensës,
Trafiku rifilloi normalisht rreth mesditës, pas rreth një orë e gjysmë ndërprerje.
Dyshohet për vetëvrasje
Megjithëse nuk ka ende një deklaratë zyrtare për shkaqet e ngjarjes, burime të besueshme brenda aeroportit kanë konfirmuar për mediat italiane se bëhet fjalë për një vetëvrasje të dyshuar. Një automjet i parkuar pranë zonës së mbërritjeve është identifikuar si në pronësi të viktimës, duke i dhënë më shumë peshë këtij dyshimi.
Nga ana tjetër, SACBO, kompania që menaxhon aeroportin Orio al Serio, në një deklaratë për shtyp nuk përmendi drejtpërdrejt ngjarjen, por njoftoi se janë duke u zhvilluar hetime të plota për të përcaktuar rrethanat e sakta të incidentit, duke bashkëpunuar me policinë dhe autoritetet përkatëse të aviacionit civil.
Pyetje pa përgjigje
Ngjarja ka hapur pyetje të mëdha mbi sigurinë në një nga aeroportet më të ngarkuara në Italinë veriore. Si arriti një person joautorizuar të depërtojë në pistën e avionëve në një kohë kur protokollet e sigurisë duhet të jenë maksimale? A ishte një mungesë momentale në kontroll, apo një dështim strukturor në sistemin e sigurisë?
Autoritetet kanë nisur një hetim të brendshëm, ndërsa mediat vendase raportojnë se shikohen me kujdes pamjet nga kamerat e sigurisë, për të rindërtuar tërësisht lëvizjet e viktimës që nga momenti i hyrjes në aeroport deri në përplasjen fatale.
Ngjarja mbetet një incident i pazakontë dhe tronditës, që ka rikthyer vëmendjen mbi problematikat e sigurisë në aeroportet europiane, sidomos në një kohë kur trafiku ajror po rritet ndjeshëm për shkak të sezonit veror.
Ndërkohë, identiteti i plotë i viktimës nuk është bërë ende publik, ndërsa pritet të konfirmohet nga hetimet në vijim nëse bëhet fjalë për një akt të qëllimshëm vetëvrasjeje apo një incident aksidental me motiv ende të paqartë.
